博出位

女星冬季花生騷

2012年12月14日 ~~ 第907期 忽然1周

天氣愈來愈凍,要快快脆添置冬季新裝喇!唔知今年興乜,又唔知點襯法?唔使驚喎!學吓班女明星咪得囉!
有愛情滋潤嘅 Sammi鄭秀文,呢排成日着到靚一靚自拍上微博,十足十專業 model一樣,仲有唔同 style任你跟風。吳君如都唔執輸,激罕 low cut晚裝。想扮可愛嘅話亦有 Angelababy同胡杏兒做代表,一句講晒,換季無難度!

鄭秀文 Model上身




自從同許志安復合後, Sammi着衫亦變得有女人味。佢嘅打扮前衞有型,絕對可以着住出尖沙嘴或銅鑼灣威威,而且幾乎隔日就有新裝面世,大家可以跟偶像做潮人。 

胡杏兒可愛中女




同樣都係走 cutie路線,已年過三十貴為中女嘅胡杏兒,着住對 Hello Kitty公仔波鞋又唔係太過火喎!襯件型格黑色皮褸竟然冇事,效果仲唔錯㖭!喺另一個場合,杏兒就以中性打扮示人,襯埋佢把短髮,都幾型! 

吳君如天價晚裝




三姑吳君如着住 Giorgio Armani新一季 low cut晚裝,性感得來又唔暴露,學佢咁着去飲宴都 ok。不過連三姑都自爆條裙「貴到跌落地」,相信價錢都好嚇人。 

Angelababy冬天少女




Baby雖然包到實,但係好有冬天 feel,顏色和諧可以突出 Baby嗰份少女味,配搭黑色 legging就多添一分潮味。可惜張相得半身睇唔晒,不過鍾意 cutie打扮嘅女仔可以學吓喎! 

文章標籤

tvb4life 發表在 痞客邦 留言(0) 人氣()