如果係翻新機,機型嗰欄最後會有「 LL」字母,使乜教人聞機啫。

IGOSSIP

放 iPhone 有保養收貴三百

2012年12月06日 ~~ 第1187期 香港《壹周刊》

以前去先達放 iPhone,通常會俾收機佬用殼花或唔齊配件之類嘅藉口,質低回收價,但從未試過會因為部機過咗保養期就收少幾嚿,事關啲機收完都係運返大陸賣,根本用唔着保養。


內地有唔少網站教人分新、舊機,就知道舊機當新機賣有幾嚴重,但教人聞氣味呢招好似離譜啲喎。

不過,最近去先達放 iPhone 4S就聽到收機佬話冇保養收少三百,心諗唔通搵我笨?問番場內線人,原來呢個藉口真係有原因,如果部機仲有保養,佢哋回收後可以話部機有事,拎返去 Apple免費換部翻新機,雖然係咪翻新機好易 check,但 Apple會換晒殼兼包番靚部機,唔識睇機型編碼嘅話,望落簡直同新機一樣;收機佬再配番其他配件後,拎番大陸就會當新機賣,賺得更多。所以如果手上嘅 iPhone 4S仲未過保養又想換機,就好盡早放埋佢喇。 

Android大好友


八月尾 Facebook重新為 iOS寫過專用 app後, iOS用家真係開心晒,睇 post睇相爽夾快, Android用家認真葡萄。唔使嬲, Facebook應該好快改善 Android版體驗,事關科技網站 TechCrunch記者 Josh最近參觀 Facebook總部嗰陣,見到 office內貼滿「 do you'droidfood?」海報,點解會咁?因為 Facebook認同 Android裝置喺三、四年後銷量將會係 iOS兩倍,唔搶先搞好 app嘅運作速度,隨時流失大量用家。至於點解叫「 droidfood」,原意嚟自 1998年微軟經理 Paul Mariz一封「 Eating our own Dogfood」電郵,內容係鼓勵公司員工多啲用自己嘅產品。套番喺呢件事上,就係叫員工多啲用 Android版 Facebook,提多啲建議同除 bug,自己人肯用,先叫做成功寫到隻用家滿意嘅 app。




除咗狗糧海報,仲有市場調查報告,大大隻字圖文並茂鼓勵員工「 switch today」。

Nexus 4平變貴


Google喺美國用平價 tablet Nexus 7成功搶走 iPad市佔率, Nexus 4亦打算用同一策略,不過嚟到香港就變晒質。

LG首部掛住 Google Nexus名嘅手機 Nexus 4,喺美國嘅銷情好理想。心急玩機嘅話,香港都有水貨返,但炒價高過四千,比起原價約$2,400($299美金,未計稅同運費)貴六成有多。好多網友話冇理由平機用貴價買,寧願等行貨。大家可能會失望喇,因為同行內人八到行貨機下個禮拜就會開賣,但定價竟然有八成機會高過四千!即係香港代理都炒埋一份,雖然同級機嚟講都仲算平,但如果知道「原價」,就一定覺得貴到離晒譜囉。 

text:周群雄、林勇

    tvb4life 發表在 痞客邦 留言(0) 人氣()