洗頭水含有大堆化學物如起泡劑、柔順劑、人造香料、色素等,隨時誘發皮膚敏感,甚至有脫髮危機。

頭號健康

化學洗頭水 愈洗愈頭痕

2012年11月29日 ~~ 第1186期 香港《壹周刊》

早前有機構調查指出,不少皮膚護理和美容化妝產品含有有害化學成分,可導致接觸性皮膚炎,嚴重的,更可干擾內分泌。但原來即使你不化妝護膚,一樣有機會中招!因為我們每天使用的洗頭水,同樣含有不少有害化學物。專家指出,長年累月使用,有機會誘發敏感不適,包括頭皮痕癢、油脂失衡,甚至脫髮。因此認清有害化學成分,精明揀選洗頭水最重要。

三十多歲的 Fanny,過往一向使用大品牌洗頭水,一直相安無事,直至年多前,問題才逐漸浮現。「我習慣每晚洗完頭先瞓覺,但唔知點解突然間有段時間開始,我夜晚洗完頭,第二朝起身啲頭髮已經好好塌,個頭又痕,好唔舒服。」
從事公關工作、經常要見人的 Fanny,為了解決頭痕頭的問題,不停轉換不同牌子的洗頭水,但情況並未有改善。「有日同髮型師講起呢個話題,佢就話,洗頭水其實含有好多化學物、添加劑,長年累月咁用,好容易對頭皮、頭髮造成傷害,所以佢建議我改用化學成分冇咁多嘅勞工梘或者番梘洗頭。」

晚洗朝 改用番梘


對於用勞工梘洗頭, Fanny有少許抗拒,於是她嘗試轉用番梘,她說用後頭髮的確較從前清爽。「頭髮好明顯冇之前咁油咁塌,但就蓬鬆一啲。不過,唔知係咪心理作用,用番梘洗頭,感覺上始終怪怪哋,我亦擔心洗得唔夠乾淨,所以嗰時都係輪流用,一星期有幾日用番梘,另外幾日就用番普通洗頭水。」
後來又有朋友介紹 Fanny用有機洗頭水,她本着姑且一試的心態,結果出乎意料,解決了困擾她多時的頭髮問題。「上年有朋友介紹我用一隻有機洗頭水,冇化學起泡劑,亦都冇人造香料、色素,用咗之後,真係再冇頭痕、頭,所以,我都幾肯定,我之前嘅問題同洗頭水嘅化學成分有好大關係!」


科大陳浩懷博士稱,有部分洗頭水添加了人造色素,可引致皮膚敏感,消費者應避免選購。


懷有身孕的 Fanny比從前更注重健康,現已由頭到腳也用有機洗護產品,盡量遠離「毒」害。

頭痕頭 屬皮膚病


不同牌子洗頭水的配方略有不同,若交替使用,可避免長時間接觸同一成分的化學物。

皮膚科專科醫生余浩德表示,嚴格來說,頭油多、頭皮痕癢,也是屬於皮膚敏感的反應,成因很多,亦有機會是由洗頭水引致。「用番梘洗頭,解決唔到問題,情況可能會更差,最重要係揀選合適嘅洗頭水。」
科技大學化學系導師陳浩懷博士亦指出:「番梘不適合用來洗頭。這是因為它的表面活性劑( Surfactant)會與水中的鈣離子和鎂離子結合,形成浮垢,不容易被洗走,如果殘留在頭髮上,就會令頭髮失去光澤、難於梳理。此外,番梘的鹼性值較大,長期使用的話,最終會令頭髮折斷脫落。」 

潔淨過強 引發敏感


至於洗頭水,陳博士稱,一般添加的都是新式表面活性劑,例如 Sodium Lauryl Sulfate( SLS)、 Sodium Laureth Sulfate( SLES)等,它的清潔和起泡效果,都比番梘的傳統表面活性劑為佳,而且不會在水中形成浮垢,更容易被洗走。
不過,正因為 SLS、 SLES的潔淨功能強勁,所以有機會導致油脂失衡。余浩德醫生解釋︰「頭皮表層有一層薄薄嘅油脂,係用來減低頭髮之間嘅磨擦,同時形成保護膜,減少真皮水分流失。不過,如果經常洗頭,例如早晚都洗一次,又或者每次洗頭都用大量洗頭水的話,油脂就會被徹底洗走,令皮膚變乾,在這種情況下,身體就會作出自我保護反應,分泌出更多油脂,結果令頭髮好油好。」他續說,有些人亦會對 SLS、 SLES產生過敏反應,包括頭皮角質層增厚,形成大量頭皮屑。

認清成分揪出毒物




既然洗頭水、護髮素日日要用,避無可避,專家提醒,市民應學懂看標籤,見到下列成分,就盡量避免購買。 

SLS可引致白內障


有土耳其科學家更曾利用白老鼠做實驗,證實若眼睛經常接觸到 SLS,會增加患白內障的機會。陳浩懷博士說︰「其實大多數洗頭水都含有 SLS,所以就算係所謂不澀眼配方,都要好小心使用,盡量唔好俾洗頭水入眼,一來眼睛係重要器官,二來因為沒有皮膚保護,會比較容易受傷。」
除了表面活性劑,洗頭水中的香料、色素、防腐劑,一樣可以是致敏源頭。陳博士說,洗頭水中的香料、色素並沒有實際功能,純粹是帶來視覺和嗅覺效果,但如果屬於皮膚敏感者,就應該少接觸色素,此外,有些人亦會對香料產生敏感反應,出現頭痛、氣喘。
余浩德醫生也曾有病人因為洗頭水的防腐劑引起敏感不適。「呢位病人係外科醫生,因為雙手甩皮、痕癢向我求醫,於是我替他做致敏源測試,揪出致敏元兇係一種防腐劑 Kathon CG,而呢種防腐劑就喺佢日日用嘅洗頭水中發現。」余醫生補充,由於這位外科醫生經常要洗手,雙手的皮膚本來就比較脆弱,因此接觸到 Kathon CG便首當其衝,出現過敏反應。如果有這種情況,他會叮囑病人雙手盡量少接觸化學品,洗頭時也要戴上膠手套。


染髮可引致嚴重皮膚炎,皮膚病患者、孕婦或哺乳婦女都不應染髮。


噴髮用品既傷皮膚亦損呼吸系統,使用時應遠離頭皮,也要保持空氣流通。

洗頭水宜交替用


余醫生又謂,我們對洗頭水的敏感反應,可以是即時出現,亦可以是日積月累才爆發出來。「即時反應係頭皮紅、腫、痕癢,亦有些病人使用某些牌子、某些成分嘅洗頭水就會甩好多頭髮,遇到咁嘅情況,最簡單就係立即停用;另外,我亦建議揀定兩、三種適合自己嘅洗頭水,然後每隔兩、三個月就交替使用,咁樣可以避免長時間接觸同一成分嘅化學物質,始終不同嘅洗頭水,成分配方都略有不同,交替使用就唔會日積月累誘發敏感。」


皮膚科專科醫生余浩德建議,如對洗護髮用品有敏感反應,可接受致敏源測試,揪出元兇。


防腐劑 Kathon CG是致敏源之一,常見於洗頭水。

染髮變爛頭


除了防範洗護髮用品,更加要提防染髮、 set頭的陷阱。余浩德醫生指出,他幾乎每星期都有一宗因為染髮出事的求診個案。「之前我有一位病人,就是因為自己染髮而出現嚴重敏感症狀,不單頭皮紅腫、潰爛,仲甩好多頭髮。」
余醫生解釋,染髮劑普遍含有 PPD,它是一種黑色染料,亦是最常見的致敏源,典型症狀包括頭皮紅、癢、出丘疹和水泡等,所以盡量避免讓染髮劑接觸到頭皮。

噴髮劑傷呼吸系統


使用造型產品包括噴髮膠、造型乳霜、髮泥等亦要小心。陳浩懷博士提醒,造型產品一般含有一些高分子聚合物( Polymer),最常見是 PVP、 PVA,這些物質如接觸到頭皮,會令頭皮硬化,阻塞毛孔,引致發炎。
另外,一些噴髮用品,通常含有至少一種揮發性有機化合物( VOC),這些化學物質於使用時會變成氣態,散發在空氣中。如果我們吸入太多 VOC的話,就有可能會損害呼吸系統。

洗頭的迷思


有名你叫,三千煩惱絲,你的頭髮,有沒有為你帶來一大堆煩惱呢?究竟凍水洗頭是否可加速頭髮生長?天然有機洗頭水就一定好?古法茶葉水洗頭又掂唔掂?專家為你解開疑團。

疑團 凍水洗頭可以加速頭髮生長?
真相 無科學根據。洗頭時水溫應適中,因為凍水不能去油,太熱則會刺激頭皮,令頭髮折斷。洗頭後宜用風筒吹乾頭髮,但切記要用凍風。

疑團 有機洗頭水一定不會引起敏感?
真相 未必。理論上愈少化學成分,致敏的機會愈低,但要注意,部分有機洗頭水一樣有添加類似 SLS、 SLES的表面活性劑,例如是 Sodium Coco-Sulfate,只是名稱不同而已。另外,不少植物也含天然刺激物,同樣有機會令人敏感。

疑團 用茶葉水洗頭可止頭痕?
真相 可以。茶葉含有不少抗氧化物,包括兒茶素( catechin)、茶多酚( tea polyphenols)等,皆有助抑壓細菌生長、減低皮膚痕癢及敏感反應。

疑團 不應常用去頭皮洗頭水?
真相 對。去頭皮洗頭水一般含焦油、抗酵母菌(如 Zinc Pyrithione)、水楊酸( Salicylic Acid),若每天使用,也會刺激皮膚,因此頻密洗頭人士應選用較溫和配方。若使用去頭皮洗頭水一段時間仍無效,便須請教醫生,因為一些皮膚病如牛皮癬、濕疹、頭皮炎等也會引致頭皮屑。

資料來源︰皮膚科專科醫生余浩德、整形外科專科醫生彭志宏、科技大學化學系導師陳浩懷博士

話你知


即使洗髮用品有天然或有機標籤,仍要留心獲認證的必須是產品和產品成分,若只是農場屬有機,則產品未必符合天然或有機製品的標準。

使用家用染髮劑前,可先在耳背後或手肘間做測試,塗少許染髮劑在清潔過的皮膚上,如 48小時內出現任何紅腫、刺痛等過敏反應,則不宜使用。 

撰文:沈雅詩
攝影:吳超德

    tvb4life 發表在 痞客邦 留言(0) 人氣()