流沙包$14

尋澄味

消夜之最 新興食家

2012年11月16日 ~~ 第903期 飲食男女

相約七十後的朋友齊齊睇《軟硬大戰草蜢》,完騷後情}仍然高漲,一班中坑到老蘭趁墟撞鬼,玩到三更半夜,醉酒朋友已經酒醒,興奮提議趕「下場」食消夜。

西環的新興,營業時間騎呢,每夜由三點開始,為港島區的貓頭鷹服務。午夜爆場的場面講都唔信,未計門口打蛇餅的人龍,全場已經塞爆第二期發育的港大書友,插針都唔入。雞手鴨腳的觀音兵,還要在眾目睽睽之下為公主病的女朋友大獻殷勤,斟茶遞水搶點心,令場面更添混亂。所以牆上貼上大字報提醒大家:夜已深,請減低噪音,而且更有英文版本,以防飲大兩杯「屎水」的打壞後生,用山寨「 chinglish」扮 ABC唔合作。
新興主打自家製作近六十款點心,樣樣經典。膽固醇萬歲的豬膶燒賣大件夾抵食,比鵪鶉蛋燒賣更懷舊,送鳳爪排骨飯一流。
那些年在飲宴場合偶爾遇上的炸鮮奶,以為已經列入博物館名單,這店的炸鮮奶雖然厚皮,但基於激罕的關係,足以令現場每一個人即時餓鬼上身。全場一人一個的流沙包是新興的招牌點心,熱辣辣軟綿綿,掰開軟薄的包皮,鮮 黄色的奶黃甜中帶鹹,洶湧程度貼近尼加拉瓜瀑布,會經手臂一直流落到手踭,好味程度要用大聲公叫醒所有人。


豬膶燒賣$14


炸鮮奶$14


生炒排骨$16


蝦餃$18




現場製作蝦餃的盛況,以無遮無擋的姿態展示,點心師傅以三秒鐘包好一粒,吸睛程度直逼日本師傅的手握壽司。彈到震傷牙骹的蝦仁,分別用作幾款不同的點心,「掙爆」筍絲和豬肉的蝦餃皇是招牌,餃皮通透而薄身,以 see through來誘惑眾生,肯定是深宵點心界的 No.1。
冬日限定的糯米包,還以為在不經不覺消失得七七八八,新興依然我行我素,蒙古包造型和當年吃過的一模一樣。塞滿蝦米的臘味糯米飯這個經典夢幻組合,合拍程度會令人不顧一切,飽到爆依然繼續狼吞,當激情過後就知道原來除了感情,還有消夜,一樣會令人後悔莫及! 




新興食家
地址:西環厚和街 10號地下
電話: 2816 0616 




少年食神林澄光( Michael)
致力用金錢換無限快樂。 TVB、 Now TV飲食及旅遊節目主持人 

攝影:馮大緯

(林澄光)

    tvb4life 發表在 痞客邦 留言(0) 人氣()