長毛摺耳貓 我得寵:霸道貓 撒尿 整蠱 李蘊 


李蘊經常帶愛貓骰骰四出接受訪問。
攝影:陳志嵐
髮型:Wing Cheung of Hair Culture
化妝:Karen Ma of iMAKEUP
服裝:Snidel

李蘊天生愛貓,皆因媽媽懷胎十月,貓咪長伴左右,李蘊出世後,圍繞她亦只有貓,所以貓成為她最喜愛的動物。兩年前李蘊網購了長毛摺耳貓「骰骰」,李蘊對牠一見鍾情,骰骰對李蘊卻不瞅不睬,更撒尿整蠱她,萬料不到令李蘊又愛又恨的,不是男朋友,而是一隻調皮的貓女。撰文:楊潔雯

李蘊不是第一次帶名種長毛摺耳貓骰骰外出接受訪問,對着鏡頭的骰骰仍然非常怕醜,望到男攝影師的時候,都會左閃右避,周圍搵窿捐,李蘊扭抱着骰骰,嘗試安撫驚惶失措的寶貝時,牠卻絲毫不給主人一點面子,當場撒尿,令李蘊一手都是尿,非常狼狽。



愛屋及烏,喜歡李蘊的人,都要跟她一樣喜歡貓。 貓咪喜黐男人

李蘊說:「你唔好俾佢外表呃咗,佢平時喺屋企好大膽,好霸道,好調皮,你唔好睇佢係女仔,佢成日周圍搞搞震,屋企有兩隻家貓,年紀已經好大,有成十幾歲,骰骰就成日蝦佢哋。」
骰骰令李蘊當場出醜,主人忍不住再爆骰骰有異性冇人性的惡行,她說:「最初買佢返嚟時,佢係好黐我,但係越大就越衰,鍾意黐男仔,如果我爹哋同細佬抱住佢,我走去抱佢,佢會唔開心,就算有時帶佢出去影相,佢見到個攝影係男仔,都會跟人唔跟我,可能我好少畀佢接觸異性,所以連人,係男性都吸引到佢。」



摺耳貓骰骰就快三歲,但仍非常怕醜。 網購一見鍾情

李蘊對貓情有獨鍾,是來自一個情意結,她說:「其實我未出世屋企已經養貓,以前有兩隻貓,一隻走咗佬,一隻死咗,可能係遺傳,我都好鍾意貓。家屋企嗰兩隻貓年紀已經開始老,我希望屋企有啲生氣,就上網搵到有配種名種貓賣,價錢係四千蚊,上到去見到好靚嘅骰骰,我一見到佢就好合眼緣,佢爸爸、媽媽都好健康,於是佢戒咗奶就帶佢返屋企。」

配種名貓特別矜貴,而且需要特別護理,李蘊說:「買之前我都上網睇過晒資料,知道配種貓身體比較虛弱,要好好照顧,所以我都唔會俾佢生BB,對佢同下一代都唔好。」

男友要愛貓

李蘊工作忙,很多時都要外出工作,幸好有家人支持和幫忙照顧貓咪,她說:「雖然佢係要特別照顧,我仍然好放心,因為我屋企人都好喜歡貓,佢哋都會幫我手照顧佢,幫佢換貓沙、餵佢、陪佢玩,有好多人都好錫佢,所以我好放心。」



自百厭星骰骰加入李蘊的貓家庭,家中增添不少生氣。 反對送寵物

所謂愛屋及烏,李蘊希望男朋友都是喜歡小動物的人,但她堅決反對伴侶送貓逗她開心:「識我嘅人都知我屋企已經有貓,所以唔會再送,同埋送小動物,其實係對生命好唔負責任嘅表現,我相信男朋友都會鍾意小動物,就算唔養都唔好討厭,因為我呢一世都會視貓為我最喜歡嘅動物,佢最好都一樣咁喜歡貓啦!」

    tvb4life 發表在 痞客邦 留言(0) 人氣()