一罐可樂出賣行蹤 軒仔斌女甜遊巴黎

張敬軒同關智斌(小斌女)密友關係眾所皆知,但要擺脫世俗枷鎖唔容易,所以佢暫時只能夠陰陰談情,就算去到國外都唔敢大解放。

本刊早排先影到軒仔同小斌女去西貢撐腳,估唔到相隔冇耐,上星期佢秘密同遊出名浪漫巴黎,共度二人世界。法國時間10月23號朝早11點,有人目擊軒仔同小斌女現身梵爾賽宮,當日軒仔住黃色Puma波鞋、深藍色衫同黑褲,戴帽小斌女就懷舊圖案外套、住背囊,兩個人一齊排隊買飛入場,但由於現場有過百遊人,條龍長到打蛇餅,所以都等超過大半個鐘;期間小斌女高度戒備,每見華人臉孔都金睛火眼目及到實,惟恐被人偷影,反而軒仔就冇咁婆媽,表現從容得多。

情迷instagram軒仔毫不介意俾人知身處法國,仲不時將具法國景色圖片掟上網,當中亦有戀人熱點巴黎鐵塔;反而小斌女就刻意避免行蹤曝光,之不過相信佢點諗都諗唔到,因為佢影一張罐可樂相片而被揭身在法國,原來有眼利網友睇到汽水罐印有法文,有網民即刻笑佢「就知道你會去!」

唔單止咁,小斌女又將一張攝於古典大廳相擺instagram,然後留低兩粒字「左岸」。嘩,呢單就直情係猜燈謎!照字解表面睇係講藝術風尚,但另一解法係指塞納河將巴黎分成左右兩岸,左岸共分六大區,較適合年輕人去,其實小斌女就正係暗示自己巴黎左岸,而無獨有偶,咁就有網友影到軒仔出現左岸13區食肆食。軒仔斌女網上談情玩到咁絕,好姨暈啦!

image
放大圖片

    tvb4life 發表在 痞客邦 留言(0) 人氣()