王維基09年已向政府申請免費電視牌照,但行政會議至今未拍板,令城電開台無期。眼見日日燒銀紙,王維基猶如熱鍋上的螞蟻,擔心會流血不止,連日來不停發功狂鬧政府,言談間充斥怨氣。在前景未明下,王維基昨日親率張可頤、劉美君等到東莞為新劇開鏡,還識做向大家噓寒問暖,以定軍心。

有「電訊魔童」之稱的城市電訊(CTI)主席王維基,決意轉戰免費電視業,為預備充足水頭打硬仗,早前他出售旗下最賺錢的電訊業務,套現50億元。王維基原預計在今年底將獲發牌,並揚言四年內豪擲25億元搞免費電視,又用6至8億元在將軍澳工業村興建電視及多媒體製作中心,並高薪挖角藝人加盟,短短半年間已開拍了八部劇集。雖然一切準備就緒,但政府行拖字訣,令王維基心急如焚,眼見日日燒銀紙,為縮減皮費,早前他被迫炒掉佘詩曼經理人公司的同事,連興建電視城的工程亦要急煞停工。

王維基瞓身搞免費電視台,怎料遇上重重阻撓,難怪他昨日在商台受訪時表現神傷。攝影:何柏佳
王維基瞓身搞免費電視台,怎料遇上重重阻撓,難怪他昨日在商台受訪時表現神傷。攝影:何柏佳

王維基昨日到東莞為新劇《客家女人》主持開鏡儀式。
王維基昨日到東莞為新劇《客家女人》主持開鏡儀式。

若不發牌訴諸法律

據悉王維基曾作最壞打算,如果最終不獲發牌,便會訴諸法律行動,但當然不想行到這一步,故他連日來高調現身,催逼政府加快審批,前日他先到立法會旁聽,昨日再去商台做訪問。王維基表明當初是政府邀請他搞免費牌照,如今像上了賊船,他昨日怨道:「我覺得好唔合理,成件事係政府搞出嚟,話希望有更多競爭,想畀市民多啲選擇……如果你政府未諗清楚,唔好搞件事出嚟吖!」他透露廣管局已做了18個月研究及公眾諮詢,結論是可以發多三個牌照,廣管局在去年7月已將資料交給行會,質疑為何拖延15、16個月仍未有定案。

張可頤坦言有跟王維基傾過開台問題。
張可頤坦言有跟王維基傾過開台問題。

暗示無綫從中作梗

歸根究柢,不斷燒錢才是致命傷,也令王維基失了預算,他說:「我哋諗住舊年已經會批(牌照),先至請咗700個同事,有咁多藝員join咗我哋,到今年本來我哋加到1,800人,跟住開台做嘢,冇諗過佢哋拖咁耐。」他承認員工心裏很忐忑,但沒有影響工作氣氛。王維基暗示無綫從中作梗,他說:「當然作為一個最主要媒體,影響力一定好大,在商言商,我唔排除佢哋背後會有好多lobby(游說)畀政府。」

推劇無期,但城電的第八部劇集《客家女人》昨如常開拍,王維基昨日親自率領張可頤、劉美君、林利、潘燦良等演員,在東莞舉行開鏡拜神儀式。王維基繼續表達不滿說:「今日係申請牌照第1,022日,我哋每日數住,希望政府知道我哋唔耐煩,唔係預期香港速度。」


(左起)曾偉權、劉美君和潘燦良首度合作拍劇,期望擦出火花。

張可頤大讚好老闆

有傳黃日華主演的劇集《警界線》突然停工,張可頤坦言有為開台事宜向老闆了解,她說:「有傾過,講嚟講去都係時間問題,唔急得,但樂觀去睇呢件事。」她大讚王維基是好老闆,經常對她噓寒問暖,她說:「以前病咗冇人理,高層都唔會嚟睇你,呢度剛相反,老闆對員工嚟講係精神支柱。」劉美君自覺是lucky girl,笑言開拍後便有好消息,問到酬勞幾多?她說:「向來唔講,但餓唔死我。」

此外,張可頤前晚在尖沙嘴出席活動,有指CTI掀起藝員逃亡潮,她說:「聽得太多,完全冇諗過呢啲負面嘢,對CTI好有信心,見佢有好多劇已拍起,自己同CTI有約,一個自由合作形式,可以出現唔同傳媒平台。」現場所見,TVB採訪隊未有與她做訪問,對於未能宣傳有份主演的無綫劇《天梯》,可頤說:「明白身份尷尬,添哥都會覺得有難度,係商業公司政策,做少啲咪好,自己都有喺電腦睇番部劇。」

採訪、攝影:丁寧(東莞)、林妃(香港)

城電出血三部曲


王維基搞免費電視,可謂孤注一擲,除了高薪挖走無綫員工之餘,又揼本拍攝劇集及大興土木,如今政府拖延發牌,分分鐘每日唔見幾十萬。

1)狂擲銀彈挖七百人

王維基為籌備電視台,去年9月發起「電視茉莉花革命」,向無綫、亞視兩台幕前幕後群發挖角SMS,為招攬人才不惜工本。至今他已成功聘請700名員工,單是演員便有200多人,除了早前公佈的184位藝人名單外,近日還不斷向藝人招手。演員大軍不乏一線小生花旦,如林文龍、黃日華、廖碧兒、張可頤等,本身酬勞已不菲,加上全是高薪挖角,當中的使費可想而知。王維基揚言要炮製高水準劇集,對幕後當然相當重視。他表示曾接見50名無綫編劇和導演,撬走了49人,據悉還包括金牌編劇張華標,能令無綫編劇全部跳船,王維基開出的薪酬必定吸引,有指他以高一倍的人工進行挖角。

2)揼本連開八套劇

王維基轟無綫劇集低劣冇新意,自家製作當然不能苟且了事。城電籌備今年會開拍八套劇集,包括《還來得及再愛你》、《童話戀曲201314》、《驚異世紀》、《第二人生》、《警界線》、《三面形醫》、《開腦儆探》,以及昨日在東莞開拍的《客家女人》。音樂劇《童話戀曲201314》是強攻無綫的頭炮,由蘇永康、廖碧兒、關楚耀主演,攝製隊今年8月更遠赴日本沖繩拍外景,相當揼本,加上由於不容許現場「飛紙仔」,故開劇前必須寫好劇本,據悉每集製作費高達100萬。此外,攝影器材方面,選用價值200萬一部、有電影級數的ARRI ALEXA攝影機,據悉王維基一口氣買下八部,連鏡頭共花了4,000萬。

3)六億電視城未動工

城電去年租用將軍澳工業村一幅約20,480平方米的土地(紅框示),並打算斥資六億元在該址興建電視及多媒體製作中心,專門製作免費電視節目及內地互聯網內容,預計三年後可投入運作。今年2月,王維基更親自率領前無綫藝員包括廖碧兒、周家怡、張可頤和黃日華等到將軍澳進行動土儀式,擺明向TVB宣戰。然而,就記者昨日觀察,該土地仍近乎丟空,毫無動土迹象,只見到有幾個發電機及一架打樁機在內。

員工熱話
藝人聲援催促發牌

蘇永康
蘇永康

CTI揸弗人王維基連日炮轟政府遲遲未肯批出第三間電視台的牌照,其實以實際情況看來,香港是可容納新台,不少過檔藝人如陳霽平、蘇永康和黃澤鋒等,昨日都紛紛開腔聲援老闆,狂插政府未有為觀眾利益着想。

蘇永康:
唔知政府點諗,做演員梗想作品畀大家睇到,遲遲唔發牌對投資者係好麻煩事,另外員工都頭痕,自己部頭拍咗一套劇,睇到佢哋有幾百人返工,家講緊幾百個飯碗,始終想成個電視業生態好啲,多啲選擇唔係壞事,有競爭先有進步。

元華:
如果有迫切需要,我都願意簽名支持或舉牌抗議,希望政府快啲批。

陳霽平
陳霽平

陳霽平:
香港咁繁榮,但偏偏免費電視台就太少,我支持巿民一齊畀壓力政府,始終行業有良性競爭,整個行業就會有進步,百花齊放。

石修:
點解政府唔肯支持CTI批出牌照?等觀眾多啲免費娛樂。

黃澤鋒:
王維基不惜工本搞一間電視台,為觀眾提供多個選擇,但政府就拖延唔肯配合,點解唔可以畀一間咁有誠意電視台一個機會?家香港話有兩間免費電視台,實則得一間,另一間都唔係做嘢,只執人口水尾播韓劇。

陳穎妍:
政府手腳太慢,應該盡早批出牌照,除咗觀眾多咗選擇,作為旗下藝人都有機會拍多啲好劇出嚟,邊個演員唔想拍嘅劇早日出街。

姜皓文:
香港絕對容納得到第三間電視台,點解唔畀觀眾多啲選擇,政府遲遲唔發牌真係有啲問題。

鄧建明:
唔擔心劇集出唔到街,拍完收咗錢,可能賣番畀TVB播仲正!

 

    tvb4life 發表在 痞客邦 留言(0) 人氣()