私人畫室
張韋怡將一間客房改裝成私人畫室,收藏作品近三十幅。唔使開工的日子,就匿喺房埋首創作。

星悅居

張韋怡 畫家

2012年10月19日 ~~ 第899期 忽然1周

以往做家居訪問,例牌介紹屋主安樂窩的間隔,但今次記者入到無綫藝員張韋怡的香閨,發覺整間屋的亮點,肯定是她親手繪畫的多幅西洋畫作品。 It's show time!

互動片段

張韋怡家居



07年,張韋怡參選港姐後俾肥監製錢國偉睇中做「味之天使」,誤打誤撞入行。 5年間,她拍過不少劇集,最令人記得的是在《怒火街頭》系列,做視后胡杏兒的妹妹。原本與家人居住在大角嘴柏景灣的她,現時改住在 853呎的賀龍居,寓所去年買入價 786萬,現已升值至近 900萬。她笑言:「原本以為摸頂買入,點知樓價仲有得升。不過我暫時唔會放,呢度好好住,實用面積又好足。」
女仔當然希望屋夠大,擺放靚衫和靚鞋,但估不到張韋怡的收藏品卻是自己一筆一墨所畫的西洋畫。


劇集密食
張韋怡入行 5年,拍過多套劇集。近作有正在熱播的《雷霆掃毒》,飾演有毒癮的拳手(小圖)。


即場獻技
張韋怡的房間放滿自己作品,而熱愛大自然的她,還在記者面前花約一小時,完成一幅開揚風景畫,勁!

滿屋作品


打開張韋怡的大門,大廳天花的吊扇風水擺設固然吸引,旁邊的大型半製成油畫亦是亮點之一,但點都唔及走廊的夜光油畫及金箔油畫搶鏡。記者還未定神,再踏進張的書房,頓時目瞪口呆。房內儲滿她多年來嘔心瀝血的作品,當中包括素描、油畫、絲花裝飾盒、手機殼等等。張說:「我 喺 11歲放暑假 嗰陣,媽咪送我去北京藝術學院學畫畫,學 咗 7年。舊年我同朋友 喺中環開個人畫室。其實畫畫通常由素描學起,最初我畫人體同裸體素描,依家就學緊油畫素描,不過學費都幾揦脷。」


貴價畫具
在房間內,擺了 10多支專業畫筆及畫掃。估唔到這些畫具每支都過百元,認真揼本。


環保手袋
張韋怡的作品範疇廣泛,還包括這些自畫手袋。「呢個狗狗手袋,原本係想用雪橇犬為題,點知畫畫吓好似我隻狗 Gucci個樣咁。」她表示平時在街上見到得意圖案,返到屋企就會急不及待根據意念設計一個袋。


電話殼贈友
張韋怡除愛畫畫,閒時亦會自製 iPhone case送給朋友。她說每個 case大約要整兩個鐘,有朋友更會俾樣辦給她,要她起貨。


金箔玫瑰
這幅金箔油畫,價錢比一般顏料貴幾倍,完成這幅畫花了六小時。


立體蘋果
咪以為呢個係真蘋果,其實是張韋怡的最新油畫作品。記者現場睇,感覺它十分立體,張本人亦甚愛此畫作。

近期張韋怡迷上夜光油畫,更開班授徒。以玫瑰為題材,這幅夜光玫瑰,用上特製的夜光顏料繪畫,日間色彩繽紛,黑夜螢光效果亦見突出。


日間鮮艷


晚上突出

融入風水


張韋怡有藝術細胞,估唔到對中國風水亦甚有研究。記者在其家中竟發現近 20個風水擺設,不止大廳、衣帽間及睡房,連廁所都擺了八卦及風水錢幣。她說:「其實冇話信唔信,但求心安理得 啫,呢啲風水嘢不外乎催旺財運同身體健康。」
雖然她篤信風水,不過最離奇她的睡房竟對住被指煞氣大的警署。「入伙 嗰陣,我都搵過師傅睇過風水,佢話呢區多名人聚居,會旺娛樂事業發展。諗過度過,梗係旺事業緊要啦,最多放個葫蘆擋煞囉!」她說。
其實,女人鍾意一樣嘢,係唔需要講理由!


兩狗陪瞓
張韋怡最愛哥基犬,一養就養兩隻,不過狗女 Gucci(前)恃住自己早「入門」,蝦狗公蟲蟲(後)。


風水擺設
張韋怡家中無論大廳、睡房、客房和廁所,都有不少風水擺設,當中以金葫蘆同黃玉葫蘆最多,她說可化煞氣及保身體健康。


自製熊啤啤
這兩隻熊仔對張韋怡來說很有意義。她還記得在小時候,母親帶她到興趣班,一齊縫製而成,至今仍保存得好好,所以見到兩熊仔如見母親。


催運風扇
講起風水擺設,不得不提大廳中央、綁上 9條紅絲帶蝴蝶結的風扇。張韋怡說可增添人緣和財運,風扇亦盡量唔好關上。而當日拍攝時近黃昏,記者倚在窗邊更可看到何文田山下的夜景。


慳家貪靚
張韋怡知慳識儉,寧願購入不少瘦面、減肥儀器,在家中扮靚,唔使光顧美容院俾人掠到一頸血。


門邊掛錢幣
家中所有風水物品都是張韋怡自己選購,這個招財金錢幣掛在大門旁邊,相當隱蔽。



撰文:娛樂組
攝影:攝影組

    tvb4life 發表在 痞客邦 留言(0) 人氣()