拍《衝上雲霄II》外景畀面 陳法拉 躁狂 吳鎮宇 收火有偈傾

【中環蘭桂坊】吳鎮宇最近被傳拍攝無綫新劇《衝上雲霄II》時經常躁狂鬧人,但前晚佢同陳法拉為新劇拍外景時,全程表現得相當親切,同法拉以及工作人員有傾有講,唔通因為同法拉相熟,所以畀面法拉?

約定11月打野戰

鎮宇09年同法拉喺電影《Laughing Gor之變節》中飾演兄妹,今次佢哋喺無綫《衝上雲霄II》再度合作,自然駕輕就熟。鎮宇前日同法拉喺中環蘭桂坊拍《衝》劇外景,鎮宇下晝五點已經去到現場,因為未夠鐘開工,鎮宇就同助手先去翠華茶餐廳醫肚,食到夜晚七點就同法拉埋位開工。

吳鎮宇陳法拉《衝上雲霄II》
【今日我至馴】
鎮宇前晚喺靚女法拉面前,即刻馴如綿羊,平時火氣當堂熄晒。

吳鎮宇陳法拉《衝上雲霄II》
有講有笑
吳鎮宇(右)

吳鎮宇陳法拉《衝上雲霄II》
認真對戲

吳鎮宇陳法拉《衝上雲霄II》
茶記開餐
助手(左)、吳鎮宇(右)
前晚劇情講述情歸鎮宇嘅法拉同鎮宇喺街邊吹水,法拉講幾講想走人,鎮宇就拉住法拉叫佢唔好走。呢個鏡頭前後拍咗幾次,唔使20分鐘就搞掂收工。拍攝期間鎮宇唔單止同法拉,仲有工作人員有傾有講,而且有唔少途人搵鎮宇合照,鎮宇都完全冇托手踭。

另外,法拉噚日喺銅鑼灣為一時裝品牌新店開幕擔任剪綵嘉賓,問佢幾時同張智霖為《衝上雲霄II》去法國拍打野戰場面,法拉話:「11月,我見到劇本都有少少嚇親,要少少心理準備。」法拉話唔使同男友申請,始終電視尺度有限。

採訪、攝影:楊浩賢、黃曉程

    tvb4life 發表在 痞客邦 留言(0) 人氣()