插圖: Wendy

揞名爆

「好高大」溝「假大眼」輸俾「四眼仔」

2012年09月21日 ~~ 第895期 忽然1周

娛樂圈好鬼細,所以男女感情關係都零舍複雜!好似媽咪姐最近同班幕後 friend吹吓水,咁又俾我八到啱啱做咗人夫、依家日日忙拍劇嘅「好高大」,幾年前原來追過當時初入行、走玉女歌手路線嘅「假大眼」。咁「好高大」話晒係歌星出身,嗰時成日借啲意話教人唱歌,跟住發動肉麻短訊攻勢。最後仲出埋撒手鐧,扮醉打電話同「假大眼」表白,不過係失敗咗嘅。

咁「假大眼」有靚仔瀟灑嘅「好高大」唔揀,最終揀邊個呢?你估都估唔到,竟然係一啲都唔靚仔、嗰時仲無乜人識嘅組合歌手「四眼仔」囉。話說當年佢哋都住北角,兩個人成日拍住拖喺嗰區出現,「四眼仔」不時又送「假大眼」返屋企㖭。你問「四眼仔」贏啲乜?男人有把口就追到女仔㗎啦,「四眼仔」唱嗰啲歌走美式街頭路線,講嘢又夠 funny,咁就夠贏㗎嘞!
之但係,呢段情都係幾個月貨仔啫。「假大眼」表面純情,實質好有「大志」嘅!話咁快就得到老細特別厚愛,依家仲話要買樓㖭。而「四眼仔」呢,都唔愁寂寞,依家同個 𡃁模結咗婚仲生埋 B,係前排發生啲小風波啫。所以話,男歡女愛嘅嘢,真係今日唔知聽日事㗎! 

tvb4life 發表在 痞客邦 留言(0) 人氣()