上流滙

光復 ball場

2012年09月21日 ~~ 第895期 忽然1周

沉寂一排的社交圈再度璀璨起來。上周末一眾 ball界猛人傾巢而出,徐子淇挽實老爺李兆基晒一家人樂融融;四太梁安琪亦帶埋何鴻燊久休復出,證寶刀未老。一於鬥晒!

徐子淇 食腦


刀削面
絞盡腦汁翌日,徐子淇仍然容光煥發出席 Hong Kong Tatler 35周年酒會。五官一向標致的徐子淇,繼續努力,臉形下巴起角。做咗人母依然尖到咁,羨慕死人。

英皇上周五( 14日)搞 70周年晚宴,向來並非 ball場常客的徐子淇和李家誠孖住出席。當晚名人雲集,徐子淇就出三招搶鏡。一:身穿透視裝露纖腰;二:拖實老爺李兆基出場;三:自爆屋企金叵羅染諾沃克病毒。做千億新抱,都要食腦。 

黎姿老公 開金口


黎姿富商老公馬廷強一向低調,見記者往往掉頭走,但英皇晚宴當晚開腔大談未來囝囝,表現 冧到極。「 BB喺 11月初出世,唔係孖 嘅,我想佢出 咗世先改名,睇下有咩靈感。」


早前本刊拍得佗住 7個月巨 B的黎姿,親自送一對孖女返學,盡顯愛心。



甘比 夠煙韌




華人置業主席大劉劉鑾雄,雖然捲入澳門世紀巨貪案,但他一於少理,當晚拖實大肚的陳凱韻(甘比)赴宴,不過離開時急步混入人群中,拒絕受訪。案件原本周一( 17日)開審,但法官突然生病,令案件押後明年 1月先審。 

霍啟剛 修身快




霍啟剛與國寶郭晶晶將於 11月舉行世紀婚禮,準老爺霍震霆近日終於開腔談及緊張心情,不過準新郎依然封口。與細佬啟山到場的他,被問到婚事進度時,粒聲唔出,但笑到下巴都尖埋,擺明做足準備,勢做型仔新郎。其實喜事唔怕講,懶神秘只會惹來傳媒挑機,失策。 

何超蓮 少女發福


賭王何鴻燊千金何超蓮,代表三房赴會,騷靚背加長腿,心情靚到暈。「 Daddy鍾意 嚟就會 嚟,佢好開心、好精神,不過太多人,佢 嚟一陣就走。」超蓮為三房發聲後,失驚無神送多幾個轉身任影,轉到連雙下巴都出埋 嚟(左圖),落力程度同老竇有得揮。





梁安琪 顯霸氣




出院後首露面的賭王何鴻燊,由四房太太梁安琪與阿仔猷亨陪伴到場,成為全場焦點。影合照時,四太發揮領導本色。先安排囝囝企位,再指揮賭王望左望右,自己就彎身配合。而久休復出的賭王亦全程擠出硬軚笑容,落足力。 

趙式芝 女人味


趙世曾長女趙式芝,孖住同性密友楊如芯去 ball。一向作中性打扮的趙式芝,當晚雌激素上升,罕有 deep V上陣,大騷事業線,女人味濃。「依家幫老竇手,要同地盤佬、渠佬落地盤好唔慣,對高 踭鞋一日報銷。」雖然情有可原,但起碼搽番指甲油先啦!





撰文:名人組
攝影:甘承威、高嘉穎

tvb4life 發表在 痞客邦 留言(0) 人氣()