插圖: Wendy

揞名爆

「神藥」人機兩「失」

2012年09月14日 ~~ 第894期 忽然1周

沉寂咗幾年嘅中年靚女「神藥」,近期又出現番,復出電視。有傳媒朋友就即刻諗番起一段關於佢嘅「奇聞」,等媽咪姐又八俾大家知啦。

呢單料發生喺「神藥」仲服務緊二奶台嘅時候,話說有次佢幫某傳媒做訪問,傾吓偈影吓靚相,但喺訪問嘅尾聲,負責訪問嘅記者收到一個工作電話,於是同「神藥」講:「唔好意思,你等一陣,我好快返嚟。」跟住就放低咗個價值幾千蚊嘅最新款手機喺影樓,去咗同一大樓但唔同層嘅 office搵同事傾公事,獨留「神藥」一個人喺影樓等。
嗯……但世事嘅嘢,真係估你唔到!當記者處理完公事返到影樓,迎接佢嘅,並唔係「神藥」,而係空氣喎。咁記者諗住人哋明星可能比較忙,所以無打聲招呼就走咗啦,但當佢想搵番之前擺低喺影樓嘅手機嗰陣,竟然發現部機同「神藥」一樣,消失於空氣!記者梗係「嗱嗱聲」 call「神藥」問問,但呢位靚女堅持自己乜都唔知喎。記者惟有翻查閉路電視,但除「神藥」外,又唔見其他人出入影樓噃。結果呢,疑點利益歸於……「大明星」啦!媽咪姐喺度奉勸各位傳媒朋友,幾時都係小心啲好。

    tvb4life 發表在 痞客邦 留言(0) 人氣()