滾熱辣

國民教育 娛圈兩派互片

2012年09月07日 ~~ 第893期 忽然1周

國民教育教出個大頭佛,搞到學生絕食、示威,辣㷫全城,更辣㷫娛樂圈。娛圈不少星爸星媽,不論子女讀國際學校抑或平民中小學,大部分反對國民教育,鄧梓峰更直指:「荒天下之大謬!」不過,出身於傳統左派學校「香島中學」的苗僑偉及何守信,以及在國內成長的楊小娟則力排眾議,不約而同力撐「國教」。「左派」與「反國教派」舌劍唇槍,咬實唔放!




不少市民帶埋細路從維園遊行到政府總部,齊齊反對國民教育。

硬撐派
苗僑偉:點會洗腦


「其實認識國家一定要,不過今次件事有政治因素。(你啲仔女都大晒,仲係讀國際學校,你自己有冇教吓仔女?)我有灌輸俾仔女,佢哋認識中國歷史都係睇英文書。依家嘅父母咁激動,都係擔心仔女被人洗腦,國民教育嘅內容可以多啲討論。其實點會洗腦,英國政府統治咁耐都洗唔到香港人個腦啦!」

何守信:國民教育係必要




「我覺得國民教育係必要嘅。每一個國家都有自己嘅國民教育,但其中嘅內容係點?點睇歷史?同事實有冇出入?呢樣嘢就好重要嘞!我覺得家長應該冷靜啲,唔好俾政客利用。過激嘅行為都解決唔到問題,我唔認為國民教育係洗腦,香港做英國殖民地咁多年,要洗腦都洗咗好多年啦!」

楊小娟:港人唔了解至驚


「我喺大陸接受教育,之後嚟香港生活咗廿年。我唔認為國民教育有乜好擔心,只係香港人唔了解至咁驚。身為中國人,了解自己國家係應該嘅。攞咗英國護照嘅香港人,英國政府唔會因為咁當你係自己人。但香港人返中國呢,只係拎個回鄉證就可以自由出入啦!咁至係自己人吖嘛!」




楊小娟和呂良偉的兒子今年 11歲,兩人對獨子極為愛錫。

關禮傑:咪一面倒反對


「小朋友讀天主教學校或者佛教學校,課程中都有宗教色彩,但唔代表出嚟嘅學生一定信!況且家庭教育亦十分重要,成長過程中,小朋友都會發展自己嘅獨立性格。大家咪一面倒反對,先去了解吓先,認為有錯至直接指出問題,要求改正。」




關禮傑育有兩女,大女楓馨 18歲,細女楓盈 10歲,仍讀小學。

反對派
鄧梓峰:荒天下之大謬


「我反對國民教育,因為暫時睇到 嘅內容,係冇空間俾學生思考及判斷,依家 嘅國民教育係要控制學生思想。其實世界各地好多地方都有國民教育,但內容只係公民教育,強調有個人嘅思考,唔係好似香港 嘅國民教育要控制學生的情緒。簡直係荒天下之大謬!」




鄧梓峰育有四名子女,孻女現正是初中生。他不時帶子女曝光,女兒 Natalie亦曾為雜誌做模特兒。

陳美琪:驚小朋友變魔鬼


「我真係好嬲!指引話要每年評估學生嘅愛國情操,學生亦要互相評估,咁咪即係要啲細路仔互相篤背脊!呢套嘢大陸十年前已經唔用啦!要推行國民教育嗰啲人,自己仔女去晒外國,咪叫佢哋啲仔女返嚟接受國民教育先囉。啲官話試吓之後可以改,咁我俾你食咗山埃先至醫你吖,我驚啲小朋友變成互篤背脊嘅魔鬼啫!」




陳美琪養女今年 5歲,明年就讀一年班,打算入讀普通小學,難怪陳美琪勞氣。

曹永廉:官員信唔過


「我覺得要俾小朋友知道事實。今屆政府唔聽市民意見,一味做表面功夫。政府官員除咗林鄭月娥我係 Like,其他嘅官員就真係太多醜聞,做錯嘢就側側膊,信唔過。我都明撤回國民教育方案,政府會尷尬,不過高官收得咁高人工,就要諗雙贏嘅方法!」




曹永廉兒子曹保熙 4歲大,女兒曹曦文更在襁褓之中。

莫可欣:指引有問題


「我喺瑞士讀書,對中國其實都唔係好認識。多啲認識自己國家唔係壞事,但我覺得有人推行國民教育時唔得誠實囉!要真真正正了解中國嘅過去,唔可以刻意收埋啲唔好嘅嘢,所以我覺得依家國民教育份指引內容好有問題!」




莫可欣為方中信誕下女兒符迦晴,小迦晴今年 4歲,方中信仍不時抱愛女出入。

黎燕珊:唔需要強迫灌輸




「雖然我個女今年剛入大學,細仔又讀國際學校,國民教育唔影響我 嘅仔女,但我覺得唔需要特登設一個科目去教國民教育,唔需要強迫灌輸。」

陳倩揚:支持學生企出嚟


陳倩揚與一歲兒子陳羲廷身穿母子裝,明顯母愛爆棚。

「我暫時中立,有真正 嘅教材先至可以表態。不過我支持學生企出嚟爭取 嘅態度,佢 哋勇於發表意見係好,不過就唔贊成咁激進,而政府亦要聽市民嘅聲音。」

楊思琦:擔心變得仲差


「唔贊成國民教育,其實德、智、體、群嘅教育已包括同科目裏面,根本國民教育唔需要獨立成科。如果成咗科,將來政府要轉教材,會變得仲差。我身邊好多教師朋友,全部都反對推行國民教育,政府應該聽意見。」




楊卓穎雖然只有半歲大,但楊思琦為了女兒不但努力撲奶粉錢,更為她未來的教育而擔憂。

姚嘉妮夫婦:唔好勉強


林煦錡(中)是姚嘉妮與林祖輝的心肝寶貝,為了三歲的小煦錡,兩人自然要發聲。

「我哋認識中國有好多途徑,因為一個科目搞到學生返完學去集會絕食,為乜先?政府又話呢科唔計分唔使考試了,但如果唔計分,學生都唔會上堂啦,邊個會去學?根本係自相矛盾!」

撐嗰個死嗰個


反國教聲音此起彼落,支持聲音反成被攻擊目標。近日藝人及電視台只要提出支持國教的言論,都會成為箭靶。

亞視收逾萬投訴
本周一( 3日),亞視節目《 ATV焦點》播映後,通訊事務管理局收到過萬宗投訴。該集內容指國民教育科的爭議,是有人為選舉而製造話題,更指學民思潮是被利用的棋子。後來亞視記者採訪反國民教育科大聯盟集會時,更被現場人士舉起抗議標語干擾。






關寶慧節食撐
關寶慧在微博表示要節食支持推行國民教育,結果被網友群起圍攻。關寶慧說:「我好支持,邊個國家冇國民教育,依家回歸中國梗係要,只不過要睇內容。」






譚校長亦被插
譚詠麟近日在網上撐一名民建聯候選人,又公開表示香港一定要有國民教育,並強調需要多溝通、多共識,但仍被網民鬧爆。








高志森「冇家教論」
高志森上周在 facebook批評學民思潮學生做騷,更指學生「握手都唔識,係冇家教。」高志森即時被洗板,網民更揚言罷睇他的舞台劇。之後他表示收番「冇家教」嘅言論。

何謂「國民教育」?


國教科,全名「德育及國民教育科」,是小一至中六的新必修科,原意是透過持續學習,使學生認同國民身份,養成良好品德。教育局建議將此科列為必修科,不設公開試,但設校內評核,學生的成績會被記錄,教育局可能會將上述資料轉送給學生未來的學校。學校可自行決定於今年、明年或後年推行國教科,此舉被指責為「先推行後檢討」。

撰文:娛樂組
攝影:攝影組

    tvb4life 發表在 痞客邦 留言(0) 人氣()