33歲的霍啟剛和 31歲的郭晶晶終於結束八年愛情長跑,拉埋天窗。二人近年亦頻頻孖住出席活動晒恩愛。《蘋果日報》圖片
唔係使好多錢啫!(設計對白)
終於嫁得出!(設計對白)

滾熱辣

絕密請帖曝光 博覽館擺酒  8千一圍 霍啟剛慳娶郭晶晶

2012年09月07日 ~~ 第893期 忽然1周

霍啟剛和郭晶晶拍拖八年,終於修成正果,早前準奶奶朱玲玲更親口確認好快派帖。不過郭晶晶這場豪門夢並非無風無浪,有傳二人受到家族爭產風波影響,搞到婚禮要縮皮,場地由五星級君悅酒店下調至會展。
這樁喜事終落實四條一( 11月 11日)舉行,霍家上下近日已用電郵通知賓客時間地點,更附上用一對新人童年照做封面的請帖。原來二人大婚的場地,並非外間盛傳的會展,而是山長水遠的亞洲博覽館。作為豪門盛事,霍家今次筵開 300圍,但稀世食材欠奉,一圍八千蚊成交。
平民價錢娶到國寶入門,霍啟剛認真識計數。


搞鬼請帖上,童年版的霍啟剛和郭晶晶手揸聽筒,並寫上「 Are tying their knot」,共諧連理咁話喎!

霍啟剛和郭晶晶擇了 11月 11日舉行大婚,為了確定賓客出席人數,男家上周陸續寄電郵俾親友,叫定他們預留時間到賀。本刊在特別途徑得到這封電子請帖。帖上一對新人大玩懷舊調皮風格,特登揀了童年時期講電話的舊相,寓意共諧連理。

酒席冇翅食


對於婚宴地點,霍家一直保密。原來一對新人上月已扑槌選址,極唔就腳,座落機場隔籬的亞洲博覽館。上周初霍啟剛就帶埋婚禮搞手團隊睇環境。知情人士說:「霍生好緊張,場地每個角落都有影低相,要求個搞手用最小嘅空間去興建舞台。」霍啟剛是霍英東後人,郭晶晶亦是全國知名嘅「跳水皇后」,大把達官貴人爭住到賀。為免得失,佢哋今次擺成 300圍,邀請近 4000名賓客。
今次喜事,霍家基金一早撥定千五萬作為籌備經費,但 300圍始終是大數目,所以霍啟剛惟有在菜單上落手,將酒席成本 cut到一圍八千蚊,價錢跟酒樓相若。知情人士說:「晶晶喺國內拍過廣告呼籲保護動物,所以一早同霍啟剛傾好菜單上唔可以有翅出現。既然係咁,霍啟剛決定一切從簡,提供基本菜式,珍饈百味欠奉,連酒水都唔使三百萬落樓。」雖然菜式一般,不過婚宴卡士強勁。據知一班奧運跳水選手如吳敏霞、何姿等已答應擔任郭晶晶姊妹,而霍郭二人亦大打人情牌,正在邀請劉翔、林丹等運動明星上台表演贈興,排場星光熠熠。




今年霍啟剛和郭晶晶經常歐遊預支蜜月。年初本刊便拍得二人到倫敦試婚紗,上月他們亦齊齊到當地睇奧運, so sweet。

羅康瑞唔坐主家席


搞掂菜單,訂好表演嘉賓名單,當晚的座位安排亦令一對新人傷腦筋。霍啟剛父親霍震霆、朱玲玲及其現任丈夫羅康瑞,基本上冇可能坐在同一枱。知情人士說:「雖然朱玲玲改嫁,但同三粒仔嘅感情依然好好,所以霍啟剛唔知點同阿媽開口,要佢同老公當晚分開坐。」母子情深,朱玲玲當然知道阿仔諗緊乜,故主動提議安排羅康瑞坐另一枱。而朱玲玲為怕羅康瑞當晚坐到悶,安插老死葉蒨文和林子祥坐在羅身邊。
座位安排問題迎刃而解,朱玲玲呢杯新抱茶飲硬。早前本刊拍得朱玲玲現身電視城,率先派帖俾慧妍雅集一眾成員,表現風騷。而霍家亦決定下周日( 9日)開始向各賓客派帖和餅卡。


準奶奶風騷派帖
早前本刊拍得戴黑超的朱玲玲現身將軍澳電視城派帖(右圖)。她一見朋友出現,便除咗副超,風騷向她們打招呼。



霍家大宅搭鐵架


周三( 5日),本刊拍得霍家大宅花園有工人搭鐵架,相信為婚前派對做準備。

霍啟剛和郭晶晶四條一於博覽館完婚後,隨即飛抵北京再擺多次喜酒,方便女家身處北京的親友祝賀。婚後郭晶晶順理成章以港人身份定居香港,進駐位於沙宣道的霍家大宅。近日霍家大宅花園開始有工人搭起鐵架,準備月底在後花園舉行 cocktail party,預祝一對新人新婚快樂。

解構婚禮




選址偏僻
亞洲博覽館佔地龐大,不過地處偏僻,由住滿名人的山頂坐車去都要 40分鐘,諗起都遠。




分開枱坐
上周四( 30日),朱玲玲帶埋老公羅康瑞出席「慧妍雅集」晚會,朱更興奮表示就快派帖。不過原來婚禮當晚,二人要分開坐。




主家席坐 36人
兩家人面廣,所以今次兩圍主家席也增至 18人一圍。鑑於身份問題,羅康瑞就被編到男方主家席隔籬。由於場地有限,所以舞台設計亦十分簡單,冇搭建伸展台。

跳水姊妹團
吳敏霞和何姿一早應承出任郭晶晶的姊妹團,但兩人相當口密,向外堅稱仲未收到通知,認真好姊妹。


《蘋果日報》圖片

莎莉幫手
朱玲玲和羅康瑞拍拖期間,已介紹老友葉蒨文(莎莉)給他認識,所以婚宴當晚就由葉陪伴羅。




平民菜單
其實二人婚宴菜單尚算得體,客人冇翅食,就用花膠取代。相信霍家因為人脈關係,可以筍價八千蚊一圍。

婚前拼搏




郭晶晶快為人妻,隨時為霍家繼後香燈,結束運動明星生涯。難怪她婚前搏到盡 𢱑銀。

百萬代言
郭晶晶婚前再為代言的護膚品牌拍攝全新廣告,更花了一個月時間,行勻全國各地區宣傳,袋走七位數。




簽勻全國
郭晶晶不停穿州過省出席簽名活動,每場酬勞接近十萬。不過錢唔易搵,早前她到合肥簽名時就俾過百群眾圍,簽到扁嘴。

超豪婚宴




豪門辦喜事,一味要誇,樣樣最靚、最 top,單計婚禮使費,分分鐘買到層豪宅。難怪霍啟剛和郭晶晶這樁婚事冇得比。

蔡加怡
今年 8月,玩具大王蔡志明孻女蔡加怡嫁設計師陳漢驄。當日婚紗、禮服均出自名設計師,加上超豪布置兼酒水,貴氣十足!
場地︰會展舊翼
圍數︰ 80
使費︰ 600萬




鄭志雯
今年 3月,鄭裕彤孫女鄭志雯,與已故鋼鐵大王龐鼎元孫兒龐建貽結婚。婚宴選用非一般的菜單,除了有新翁龐熙珍藏的 30頭吉品乾鮑,酒單中更包括全球未開售的 2004 Pol Roger Brut香檳,夠晒浮誇!
場地︰會展新翼
圍數︰ 200
使費︰ 1100萬

採訪、撰文:娛樂組
攝影:攝影組
插圖:冼錦堂

    tvb4life 發表在 痞客邦 留言(0) 人氣()