為討好新晉金牌明星孫楊,基仔、 Eason各施各法。

探熱針

林丹孫楊訪港  Eason基仔鬥搶

2012年08月30日 ~~ 第1173期 香港《壹周刊》

今時今日中國運動員明星化,尤其是奪金國寶「超級丹」林丹,上週隨中國奧運金牌選手訪港,三日兩夜行程滿檔,但身邊兩位星級老友古巨基、陳奕迅有理無理,親自出馬要約見「超級丹」,此舉無非想同國寶保持緊密關係,鋪定路開通金牌國寶他日殺入娛樂圈之門。

低調收禮怕非議


一連三日(八月二十四至二十六日),四十七位中國奧運金牌運動員訪港, 衞冕奧運羽毛球男單冠軍的「超級丹」林丹,繼續是焦點所在。
大隊上週五早上十一時抵港後,馬不停蹄要出席一個接一個的「俾面派對」,但林丹的經理人公司、李寧旗下的「非凡中國」,卻要求攝期放人,事關他們早已約好英皇老闆楊受成,安排「超級丹」到尖沙咀英皇鐘錶門市收禮物。
為怕高調收禮引起爭議,活動延至晚上出席完特首梁振英的歡迎宴後才進行。當晚林丹獲贈印有代表他取下十七個金牌的「 17」字樣金牌,其妻謝杏芳都有鑽石禮物,賀二人九月底大婚。


孫楊父母均是內地大學的體育科教授,家教非常嚴厲,當日上雷頌德錄音室練歌,父母都有貼身同行,更充當保鏢,阻截 fans埋身攞簽名影相送禮。



陪飛魚練歌


楊受成送厚禮冧林丹,旗下一哥古巨基亦出招,向另一位金牌人氣王孫楊埋手。兩人被安排在「大匯演」同台合唱,開騷前一晚,孫楊由父母陪同,漏夜到雷頌德位於新蒲崗的錄音室,基仔順理成章孖住練歌。
繼劉翔後,基仔金牌老友名單再添新成員,英皇「一箭雙金」,成功接近林丹與孫楊, Eason經理人陳家瑛亦不甘後人,事先張揚林丹會睇 Eason演唱會。
可惜林丹因為要錄節目失約,據知最後將門票轉贈孫楊。話晒係新一代金牌人氣王,冇林丹, Eason同孫楊合照放微博,絕對無失禮。


週五晚出入金行再食火鍋,林丹分別乘坐陳家瑛的保母車、 Range Rover及馬沙拉蒂出入,認真大陣仗。


英皇送金牌俾林丹,為免遭外間話柄,英皇當日未有安排傳媒採訪,林丹只能以「私人名義」收禮。


來港三日兩夜,林丹不停被捉住影相簽名,上週六(廿五日)身在觀瀾湖贊助宴會,攰到連魚翅都食唔落。


八十四歲的林貝聿嘉對林丹非常熱情,扯住唔放要合照。

吼住國寶


伏明霞(箭咀)一家到九龍公園泳池睇跳水,師妹吳敏霞與她的長女擁抱。一次過重遇教練與師弟妹,小伏臨走時依依不捨,感動得哭起來。

黐實國寶,有好冇衰。據了解,孫楊將步林丹後塵,簽約「非凡中國」,而公司的 CEO Silence,過去廿多年來在內地不停為港星搞演唱會,有中國張耀榮之稱。早兩年加盟李寧旗下,與不少唱片公司高層、經理人及歌星稔熟。
「 Silence前兩年包晒 Eason國內啲騷嚟做,同陳家瑛有傾偈,另方面,佢都有同英皇嘅容祖兒、 Twins同埋霆鋒搞騷,同 Mani(霍汶希)都好熟,所以叫去收禮物又好,去睇騷都好,幫到一定幫。不過數年前試過田亮出席太多商業活動,又高調想簽英皇,引嚟外間太多負面反應,『非凡』幫運動員接 jobs會好小心,至於運動員日後會否簽香港嘅娛樂公司,其實都無絕對,長線睇,冇壞囉!」一名「非凡」員工說。

撰文、攝影:娛樂組
mailto:nextb@nextmedia.com

文章標籤

tvb4life 發表在 痞客邦 留言(0) 人氣()