徐濠縈慶幸:我冇豬朋狗友

陳奕迅(Eason)被認為相識滿天下,但身為Eason嫂的徐濠縈不讓老公專美,朋友亦多籮籮,自言是重感情之人,幸運認識一班真心朋友,能分擔喜與憂,謝絕豬朋狗友之餘,亦多得朋友穿紅線,遇上自己的Mr. Right!



性格慢熱的徐濠縈,身邊好友甚多,玩樂傾心事都唔怕冇人陪。

我係雙魚座,個人敏感重感情,又多愁善感。朋友對我嚟講好重要,因為我唔開心,唔會收收埋埋,個女(包包)又細,都唔明噏乜,有時啲嘢又好難同屋企人講,朋友就係最好嘅傾訴對象。我係個慢熱嘅人,好怕人對我太熱情同太過主動,又或者知我係邊個嘅老婆而想同我friend,我會驚囉!老公成日話我個樣cool會嚇走人。其實我好難熱情,諗嘢時冇表情兼唔出聲,先畀人覺得個樣寸同惡,但盡量會改變。我覺得自己好幸運,個個朋友都對我好真心,冇豬朋狗友,我唔會識啲唔真心嘅朋友,好似我同Eason感情出問題,馮德倫嗰排喺我身邊好多,不停咁勸我!


徐濠縈與老公陳奕迅當年感情出現裂縫時,幸有馮德倫聽她傾訴。

性格直 人緣不俗

我性格爽直,唔鍾意轉彎抹角,人緣亦算OK,有唔同類別嘅朋友:跑步友、媽咪組,唔同類型嘅朋友都吹到水,不過有咗包包,好多時間放晒個女度,又或者時裝店度。朋友之中見得最多,我諗係Johanna(本地時裝設計師何志恩),大家都有小朋友,佢兩個女係我哋契女,而我同佢設計上又有合作。Wyman(黃偉文)都會成日見,佢太鍾意包包,至於霆鋒就好似一陣風,佢好忙,不過一年都見到幾次。

為湊女 減少夜蒲

其實,我依家都鍾意蒲,不過有女要湊太攰之嘛!以前個女仲細,每星期可以蒲一、兩晚,我仲記得有雜誌話我唔湊女排隊去蒲,真係好笑,如果你日光日白影到我仲去買啤酒飲就話啫,我等個女瞓咗去蒲有乜唔恰當?總之,我唔會澄清,最緊要瞓我隔籬嗰個知發生乜事就得,但佢都冇出聲,其實我好有交帶,去邊都會講低。你估Eason唔想蒲咩?佢咁紅,公眾場合佢點去,加上佢好易醉,試過飲一罐啤酒就「冧」咗,點帶佢出嚟蒲?所以Eason只會去梁漢文屋企打機,而我就同Karen(梁漢文老婆林文慧)去蒲。不過包包開始大,會同你傾偈,瞓晏啲都唔得,我冇咁嘅精神去蒲,依家夜蒲要等大日子先有機會!

文:名人組

    tvb4life 發表在 痞客邦 留言(0) 人氣()