插圖: Wendy

揞名爆

「唱得好」同「白臉書生」爭女

2012年08月17日 ~~ 第890期 忽然1周

男人呢,真係無邊個唔偷食!今次呢單料,講嘅係入行無耐、拍過攞獎片嘅「白臉書生」,同埋有地位有老婆兼做人老竇嘅「唱得好」。咁佢哋爭邊個呢?咪就係早前俾人搶仔、喊爆嘅 𡃁模「連連」囉!

係呀,兩位男主角明明唔同 level,但男人無論幾多歲都係鍾意啲廿零歲嘅。所以佢兩個一見人哋清純少女失戀啫, 9秒 9撲出嚟安慰!好似「白臉書生」其實有個圈外女友,但之前同「連連」拍戲嗰時,已經爭住獻殷勤,見人哋失戀,即刻喺網上留埋啲冧女留言,叫人唔好傷心。不過佢後來都知「出事」,又「身有屎」咁刪咗啲留言。
「唱得好」又點呢?年紀大啲就真係大啲,冧女招數都有「層次」啲!佢首先喺「連連」面前打「白臉書生」毒針,話佢有女友仲四圍溝女,唔係好人。然後呢,又以前輩、大哥哥名義,時不時用電話呀短訊呀,去照顧人哋情傷嘅心。當然,仲會好小心咁約人哋出嚟,溫柔呵護。 Well,據聞「唱得好」仲同「連連」講,要同佢合作㖭!嘩嘩嘩,妹妹仔聽到呢啲說話,仲唔冧晒咩。媽咪姐只想講句,搞上人夫盞你造孽又傷心,自己諗諗啦!

    tvb4life 發表在 痞客邦 留言(0) 人氣()