插圖: Wendy

揞名爆

「詩詩」黐金糠失敗

2012年08月10日 ~~ 第889期 忽然1周

喺娛樂圈,好多女星都想黐富二代,博攞着數吖嘛!而屬於半個圈中人嘅「詩詩」都唔例外。據圈中靚太報料話,呢位失婚靚女原來同娛樂公司老細「金魚眼」個仔,近年一直有親密「互動」!佢仲猛向呢位富二代落嘴頭,話自己開咗無耐嗰間 model公司好有前途,慫恿 honey叫疊水阿爸買起佢,大家親上加親喎!其實明眼人都知「詩詩」開嗰間只係蚊型公司,旗下嗰啲都係 model仔,擺明想借富二代過橋,喺「金魚眼」身上賺番筆囉。
不過,呢個圈真係好鬼細,唔少明星喺唔同渠道收到呢個風,都即時走去同「金魚眼」打報告,話阿仔只係俾女迷,叫「金魚眼」千祈唔好收「詩詩」間公司仔喺旗下,免得影衰晒自己個大品牌呢!咁堂堂大老細,當然係有腦嘅,立刻停一停,諗一諗,跟住就同個仔講,呢單嘢遲啲先再算啦!
噢,以為釣到大水魚,周圍同人講自己好快「升呢」嘅「詩詩」,依家到爆,唔敢再咁大口氣四圍唱嘞。查實呢,靠黐唔係鋪鋪 work㗎!媽咪姐幾時都話,努力做好自己最實際!

    tvb4life 發表在 痞客邦 留言(0) 人氣()