有劇追

《怒火街頭 2》 Law霸回歸爭視帝

2012年07月27日 ~~ 第887期 忽然1周

2012年話咁快過咗一半,又開始視帝之爭啦﹗
目前形勢:兩屆視帝黎耀祥嘅《造王者》已安排下個月 13號播,以祥仔人氣及演技,應被睇高一線。加上《心戰》嘅陳豪同鄭少秋、《回到三國》(現正播映中)嘅林峯等,本來已夠壯觀,誰不知突然殺出《怒火街頭 2》嘅鄭嘉穎,形成一場既緊張又刺激嘅視帝大混戰。
舊年憑《怒火街頭》風光之極嘅鄭嘉穎,威到去強國,恨死好多小生。無綫為咗延續 Law霸氣勢,除《怒火街頭》深夜重播以壯聲勢外,亦有傳要將黃宗澤嘅《護花危情》 cut短集數俾《怒 2》插播。如此看重,若《怒2》叫好又叫座嘅話,就算強大勁敵當前,對鄭 Law霸講,再奪視帝應無難度。

播映日期  7月 30日起周一至五晚 9:30pm翡翠及高清翡翠台


鄭嘉穎摒除官仔骨骨演爛仔律師,仲要上一次露股罅,今次就蝕「底」(小圖),危險鏡頭亦親身上陣,真係夠晒給力。


因妨礙司法公正入獄嘅 Law霸,終於刑滿出獄。思苦接 Law霸出獄,開心到震。

無綫年底視帝之爭,雖然粒粒都係強敵,但對近年擁有強大氣勢嘅鄭嘉穎嚟講,影響應該唔係咁大。先唔講佢喺強國賺咗幾多人仔,單講人氣,佢挾住「 Law霸」吐氣揚眉後,殺上大陸,一齣《步步驚心》令其「火上加油」,加上早前又奪得上海華鼎獎「電視劇演員公眾形象滿意度調查第一名」,氣勢一發不可擋。奧運大戰即將爆發,無綫以其主演嘅《怒2》迎戰奧運,可見無綫對鄭 Law霸嘅叫座力有着無比嘅信心。


Law霸同思苦代表塌樓意外受害人,向奸商超龍(麥包飾)追究責任及賠償,因而令超龍對兩人懷恨。


又靚又叻嘅醫生景伶俐(苟芸慧飾)唔理老竇反對,去咗低下階層區嘅深水埗開業同定居,竟然俾爛撻撻嘅 Law霸吸引,介入 Law霸同思苦感情之間。

《怒2》今輯法庭 case,以反映民生為主,諸如勞資糾紛、公廈骨灰龕,塌樓事件等,同《怒 1》恩怨情仇唔同。 Law霸羅力亞出監後,同女朋友王思苦(胡杏兒)組成深水埗「神鵰俠侶」。雖然兩人處事方式有分歧,但仍努力為弱勢社群出力。撇除公事,私底下兩人仍愛得痴纏,可惜好景不常,靚女醫生景伶俐(苟芸慧飾)從美國返香港,喺深水埗開業,遇到 Law霸,令思苦同 Law霸嘅感情受到衝擊。最後一宗塌樓意外更令 Law霸惹嚟殺身之禍,死黨丁家富(李璨琛飾)、米佐治(林子善飾)及新落區嘅 CID梁包升(曹永廉飾)同受牽連。
《怒 1》佳績連連,而《怒 2》內容又跟香港環境息息相關。監製陳維冠說:「《怒 2》一定會引起觀眾共鳴。」信心爆棚。


突然發生塌樓意外,令 Law霸及思苦等人大為震驚。


法官新丁米佐治(林子善飾)同娘爆雜差梁包升(曹永廉飾)既係死黨,又係情敵,關係微妙啊。


米佐治、梁包升及事務律師高雅(李雪瑩飾)發展出一段輕鬆惹笑嘅三角戀。


思苦阿媽潘小琼(程可為飾)亦係塌樓意外受害人。


自從何利貞(陳敏之)死咗後,社工丁家富(李燦琛飾)全副精神寄託喺工作上,但當按摩女郎錢心心(賈曉晨飾)出現後,佢又開始囉囉攣。


角色關係

    tvb4life 發表在 痞客邦 留言(0) 人氣()