露台面向無敵維港景,但原來麥師傅平時甚少出去,只間中招呼朋友到露台飲吓茶傾偈,反而老公每朝起身都會出露台做運動。

星悅居

麥玲玲 玄美之家

2012年07月27日 ~~ 第887期 忽然1周

百物騰貴,尤其係樓價,好多人窮一生積蓄,都只係想買到一間家宅安寧、事事順境的風水屋。
已租住北角賽西湖大廈接近四年的麥玲玲,家居大至客廳、主人寢室,小至大門旁一小角都設有風水陣,務求風生水起。「其實呢間屋本身風水好,住喺度期間,我先後買咗兩間屋。舊嗰間買入一年即賣賺咗四百萬,另一間喺貝沙灣,舊年二千一萬買,依家賬面都上到近三千萬,所以我喺呢間屋所布嘅風水局,除咗有催財運擺設,主要都係求健康同平安。」就等麥師傅教你布一個必勝家居陣。



麥玲玲玄美之家


露台


貼士:
●露台向海:水為財,可放大葉植物吸財氣。
●露台向山:若見三尖八角之山景,宜放圓形擺設化解。
●露台向樓:窗外若見尖角或大廈之間的隙縫,宜放銅製重物化解。

麥玲玲所住的賽西湖大廈,屬北角老牌藍籌大屋苑,雖然在 70年代落成,但由於屋苑幾乎每戶都擁有無敵維港大露台,因此每呎叫價接近二萬蚊。就如麥師傅所租住的單位,亦由四年前最初二千四百萬,躍升到現時三千五百萬。「其實好多人問我幾時先適合買樓,究竟依家買樓係摸頂定追落後,其實以風水學嚟講,龍年計新曆九月八日開始,回吐壓力會愈來愈大,尤其小型樓盤會更加明顯。預計今年第四季至明年初會暗湧四起,所以有心買樓嘅朋友千祈唔好心急,睇定啲先。」


大門旁一角放有一盆金蛋,可聚財氣。「喺大門放一啲金色嘅擺設,特別係雙數擺設,可望財神親臨家中。」



飯廳




一向有拜觀音的麥玲玲,在飯廳放有一個觀音像,家中觀音像位置坐南向北望海,作用是保全家平安。而飯廳兩旁亦放有多個風水飾物,主要是保家人健康。

貼士:
●餐桌是飯廳靈魂,圓形方形皆可,但切忌三尖八角,有損家人和氣。
●大門和廁所對正飯廳,風水大忌也,因大門和廁所氣流有礙家人腸胃健康。

客廳


貼士:
●客廳顏色宜柔和為主。
●忌放尖銳或帶煞氣的擺設,以免對健康不佳。
●宜多放吉祥意象之擺設。


客廳擺設簡約,淺啡色梳化和木地板色調一致。淺啡色屬暖色,可增強家人融洽關係。


客廳近露台位置地下放有蘭花。據麥玲玲講,在露台或窗口位置放兩盆蘭花,可旺財運,至於在電視旁放的一盆,則旺人緣。


紫晶洞和晶石擺設放在客廳一角,可增強事業運。「個紫晶洞係好多年前師傅送俾我,佢唔止係風水擺設,對我嚟講仲有多重意義。」

黃色主調利和諧


踏入麥玲玲家居,映入眼簾第一眼,當然是盡覽維港景色的大露台,其次是整間屋的黃、啡色主調顏色。「黑白色設計嘅家居,無疑係品味設計,不過黑白灰色係冷色,如果住喺入面,家人關係會較冷漠,而且心情會較鬱結。而黃、啡係暖色,會有家嘅感覺,家人關係會較親密。」
雖然家居擁有二千呎空間,但麥玲玲平時逗留得最耐的,反而是書房。研究開命理術數的她,風水書當然唔少得,但估唔到書架上藏書比例,竟然係烹飪書比風水書更多。「其實我好鍾意睇書,每個星期都會行書局,除咗命理書,因為自己鍾意煮嘢食,所以買咗好多食譜同有關飲食健康嘅書。」瘦緊身嘅麥師傅當然冇口福試新菜,不過為了家中另一半,就算幾忙,她都會下廚煮幾味撚手小菜餵飽老公。


放在飯廳旁的銅馬,是麥玲玲到外地旅行時購買。「我成日都要出門,放隻銅馬喺屋企,代表驛馬星動,可保出門平安。」


水晶佛像是麥玲玲朋友投其所好送贈的。「我本身冇買水晶習慣,呢個佛像係朋友去內地旅行時買俾我。」


麥玲玲和丈夫結婚多年恩愛如昔,忙到幾乎三餐都要在出面食的玲玲師傅,一有時間便會在家落廚煮幾味冧老公仔。

書房




書房亦是麥玲玲的工作室,因此是她逗留得最多的地方,以粉紅相士為人認識的她,所用的電腦當然亦是粉紅色。

貼士:
●書房最好以白或 黄光為主,加強文昌力量。
●綠色同樣代表文昌,可添置綠色家具,牆色亦可選用粉綠色。

書房近牆放了一整排書櫃,熱愛睇書的麥玲玲,除了有命理書外,最多的竟然係烹飪書。「我好鍾意睇出前一丁呢本書嘅食譜。唔好以為煮即食麵好容易,其實煮得好食都好有學問。呢本書就教你唔止煮麵同撈麵,仲有好多煮法。」







睡房




麥玲玲夫婦的睡房,以粉紅色為主色,浪漫顏色有助增進夫妻感情。她說:「喺邊區住我老公揸主意,間房布置就梗係我話事啦!」

貼士:
●睡牀要有牀頭板,代表有靠山。
●睡牀忌見橫樑壓頂。
●天花燈影響力等同橫樑,因此千萬不要添置吊燈。
●睡牀不能直接對正浴室門,否則婚姻容易出現第三者。




在麥玲玲的衣櫃中,幾乎清一式是套裝,以顏色分類排列整齊。她自認是超級執拾狂,若然發現顏色次序有錯,少有發脾氣的她亦會忍唔住發忟憎。

單位平面圖






除了幫人睇風水,麥玲玲最近亦在淘寶網開了一個「吉慶堂」的網站,售賣風水小飾物,包括有旺姻緣的電話吊飾,有旺人緣(粉紅)的手帶,亦有增進學業運(粉綠色)的手繩。咪睇呢門係小生意,好似之前高考期間,麥玲玲便賣了過萬條學業運手繩,若一條賣$188,生意額已高達過百萬。





    tvb4life 發表在 痞客邦 留言(0) 人氣()