震後今年晒冷
今年係有視帝黎耀祥、視后胡杏兒撐場,但整體嚟講,藝員分量好明顯真係弱咗好多!「殼王」要諗吓計嘞!

媽咪姐

TVB無厘頭晒冷大獎

2012年07月20日 ~~ 第886期 忽然1周

星期二( 17日),無綫忽然出動 329位藝員,搞咗個大晒冷活動,準備拍一個重量級扮嘢騷《玩轉三周 1/2》,迎戰有線奧運節目。呢日係「殼王」陳國強入股無綫後,首次現身督師,戲劇組梗係全線停廠放人。嘩!媽咪姐都好耐未見過咁墟冚嘅場面,仲勁過台慶呀!


震前星光燦爛
前年台慶亮燈,仲有鄧萃雯、佘詩曼、苗僑偉、黃日華陪住六叔影相,星光熠熠㗎。

講真吖,呢兩年 TVB震完又震,搞完賣盤又俾王維基狙擊,依家先叫定番啲。嗱,上年 TVB震得咁厲害,就唔好計嘞!但比起前年「地震」前嘅星光,今年真係弱咗唔少。無嘢嘅,一朝天子一朝臣,再望真啲,都有唔少人值得「嘉獎」㗎!睇咗先講啦。

亞視新勢力
陳展鵬 江美儀




近年 TVB當家花旦小生買少見少,造就一班由亞視過檔嘅實力派演員捱出頭來!好似 08年入 TVB嘅陳展鵬,依家企穩第一排,同樣曾為亞視人嘅江美儀,亦由兩年前嘅第 4排,跳前到第 2排,難怪兩個人搭晒膊頭咁 happy啦!

喪玩孖寶
黎諾懿 唐詩詠




呢日影大合照,黎諾懿猛同唐詩詠講笑喪玩。嗱,媽咪姐就絕對贊成唐詩詠多啲接觸異性,忘記花心崔建邦嘅。但黎生怕唔怕你個億萬女友呷醋先?

友誼萬歲
曾志偉




「殼王」陳國強同曾志偉 friend就係人都知!呢日佢哋不避嫌攬頭攬頸,「獎門人」亦企正中間位影大合照。但媽咪姐只想講,最近喺《五覺大戰》、《環遊世界明星賽》同其他綜藝節目都見到曾生喎,好滯呀!

跳級精英
黃智雯




07年港姐黃智雯,前年仲企緊第 5排,今年已經連跳 3排,上到第 2排企胡定欣隔籬。咦,睇佢呢個樣,好似「關二嫂」上身咁款喎!後生女,媽咪姐知你依家劇接劇,但記住唔好未紅先驕呀!

第二梯隊
陳茵媺 李詩韻




李詩韻 03年選港姐入行,依家終於企第一排。 06年港姐冠軍陳茵媺就多得男友陳豪帶挈,今年亦企第一排。佢哋 31歲嘞,就算拍劇捱到影相都想瞓,點都要撐住,博上一線啦!

戰鬥力最強
徐子珊


同新老細「殼王」傳過緋聞嘅徐子珊,呢日 deep V搏盡。佢呢個撥髮伸脷 pose,唔好話用「殼」,就算用埋「金鐘罩」都頂唔住啲電力啦!





tvb4life 發表在 痞客邦 留言(0) 人氣()