揞名爆

「高瘦平」又打又拎

2012年07月13日 ~~ 第885期 忽然1周

自從成功私有化咗遊戲人間嘅「小飛俠」之後,「高瘦平」呢幾年已經處於半退休狀態,好少拍戲拍劇,兩個人得閒就打機或者去旅行。當然,唔少得嘅,仲有打羽毛球!你打個波過去,我又打番個波過嚟,一來一往,幾溫馨呀!

但係講開打波,最近又有圈中二五爆料,話「高瘦平」原來鍾意又打又拎喎。話說呢位靚女都打咗幾多年羽毛球,定期會同一班波友聚吓,有一排仲同無拍戲好耐嘅「新龍女」 friend咗,得閒就切磋㖭。不過,有次大班波友如常約埋去練波,玩咗 2個鐘,個個都嗌「夠皮」,就陸續去更衣室沖涼換衫。突然,有人就喺球場邊大嗌:「咦?我新買嗰塊拍呢?之前明明放喺度㗎!」於是大家幫手四圍搵,又打開自己個袋 check吓,睇睇有無攞錯。平時聲大大嘅「高瘦平」呢個時候竟然無乜出聲,又無打開自己個袋去 check。
明眼人都覺得有啲奇怪,但大家係成年人,又成日一齊打波,打埋算盤亦算係 friend,又點好意思講啲乜呢。最後,失主都決定唔再搵,當自己「黑仔」算數!不過,有位波友事後講番,話見到「高瘦平」將人哋塊拍放入袋,佢初時以為呢位女明星咁好人,幫人執埋拍,誰知佢係拎完扮無嘢,咁鬼無品!哎呀,媽咪姐聽到呢度都嚇咗一跳,惟有祝「小飛俠」好運啦。

    tvb4life 發表在 痞客邦 留言(0) 人氣()