離婚前扮恩愛
姬蒂賀姆絲上月中到冰島探老公湯告魯斯班。人前雖然拖住手,但姬蒂個樣燶過鑊撈。

來路貨

好心分手

2012年07月13日 ~~ 第885期 忽然1周

上月尾 6月 28日,荷里活爆出驚人消息,姬蒂賀姆絲( Katie Holmes)單方面入紙向法庭申請同老公湯告魯斯( Tom Cruise)離婚。
正當大家搬定櫈仔,諗住睇佢哋互揭陰私、互爭撫養權時。誰不知,本周一( 9日),呢對過氣夫婦火速達成共識,喺和平氣氛下傾妥所有離婚、撫養細節。
零嗌交無陰私,作為等睇好戲的我們,可否嗌回水?

未講咁傷心嘅事之前,我哋先唱首歌, music,「逝去感情如何留得住,半點癡情遺留殊不易,太多悽悽慘慘的遭遇,我不知道……」
感情嘅嘢,有時好難解釋嘅。事實上,湯姬戀當年突然撻着,轟動一時;如今火速單方面離婚,某程度其實幾連戲。不過咁就引嚟傳媒揣測,離婚原因可謂眾說紛紜。


2006年結婚


2005年撻着


姬蒂 2005年跟湯佬撻着,更火速懷孕。 2006年誕女後,於意大利拉埋天窗,一直恩愛。今年奧斯卡,兩人仍結伴出席,於頒獎禮後嘅慶功派對上,當眾咀嘴大晒恩愛,完全冇離婚徵兆。


2012年鬼馬合照

都是湯佬的錯


一般講法,係指姬蒂難忍湯佬對科學教派沉迷,為防女兒 Suri受到荼毒,於是揮劍斬情絲。另一說法,係男方操控慾過強,事事要女方遷就。 2005年嘅《吸煙無罪》,姬蒂與男主角艾朗艾克( Aaron Eckhart)一幕情慾戲被湯佬禁止出街,連帶海報、劇照一律都唔可以以此做宣傳。其後嘅《蝙蝠俠:俠影之謎》更加離譜,除不准愛妻跟其他演員來往,假使要出外宣傳,姬蒂只可以乘坐湯佬嘅私人飛機,不得跟攝製隊同行。據講此舉惹嚟同劇老戲骨摩根費曼( Morgan Freeman)不滿,仲引嚟其他藝人恥笑。加上兩公婆聚少離多,離婚,都係遲早嘅啫。


姬蒂暴瘦湊女



湯 姫 2006年誕下囡囡 Suri,對佢寵愛有加。喺離婚後數日,姬蒂孤身一人湊女,大露背之下雖見微波,但背脊瘦到凹陷,相當恐怖。

火速落幕


離婚事件爆出後,有傳媒曾估計有好戲睇。皆因雙方對 6歲囡囡 Suri嘅撫養權虎視眈眈,以姬蒂與湯佬 6年婚姻所知嘅秘密,有理由相信,姬蒂為奪得囡囡,將不惜一切爆大鑊。直至本周一( 9日),事情峰迴路轉。原來雙方律師已達成協議,兩人喺不用上庭嘅情況下離婚。至於離婚細節,例如贍養費幾多、女兒撫養權,一切保密。但據小道消息,姬蒂可分得 2千 5百萬英鎊,並獲得主要撫養權;湯佬則一星期可探囡囡一次。
湯姬離婚如此火速落幕,大家可能少咗個話題。不過咁都好嘅,對簿公堂始終好影響下一代。江湖的確無必要多一場腥風血雨。


愛女躁底發忟
有指 Suri因受到父母離異影響,變得特別暴躁。早幾日 Suri同媽媽行超市時,被狗仔隊搞到一臉不耐煩。


湯佬終於蒲頭
湯佬新作《 Jack Reacher》最近發布劇照。雖然佢近年氣勢下滑,但根據福布斯最新調查,湯佬係荷里活最高薪酬男星。如今離婚,市場又多個筍盤。


一直喺冰島拍戲嘅湯佬,本周二( 10日)終於返到洛杉磯。頭戴 cap帽嘅佢,可能搞掂離婚,狀甚輕鬆。

火速離婚時間表


荷里活夫婦搞離婚,有時擾攘一年,甚至幾年都試過。原因?不外乎爭撫養權爭物業等問題。今次湯姬能火速達成共識,實屬罕有。
6月 28日
姬蒂單方面入紙離婚。
6月 29日
姬蒂率先發布離婚聲明,突然「被離婚」嘅湯佬被殺個措手不及,於稍後時段再發聲明,表示「深切哀傷」。
7月 2日
姬蒂發離婚聲明後首次露面,身旁更換上新一批保鑣,以免舊保鑣向湯佬通風報訊,影響離婚進度。
7月 9日
雙方共同發聲明表示以女兒 Suri利益為大前提,懇求各界尊重佢哋私隱。其後,姬蒂代表律師向傳媒發放達成離婚協議嘅消息,但未有進一步公布當中細節。

    tvb4life 發表在 痞客邦 留言(0) 人氣()