前無綫資深藝員兼著名配音員馬小靈,三年多前為攝影師丈夫誕下女兒麥可琳(Holami),現時已轉型從事地產經紀的她,屢獲獎項,成績彪炳。而在兼顧事業的同時,她還要照顧好動醒目的囡囡,訓練出無比的耐心,並悟出一個作為人母的道理:「就係千祈唔好亂咁向小朋友承諾,因為佢一定會記得。」

為讓天性聰敏又好學的女兒認識更多,馬小靈只讓女兒收看益智的英語教育節目,「由佢出世開始播,佢啲英文唔使我教都好流利;其實愈細嘅小朋友吸收能力特別強,應該盡早畀佢哋接觸唔同嘅語言。」

馬小靈曾演出超過十部無綫的劇集,此為《雲海玉弓緣》的造型照。

馬小靈在無綫期間,曾上EYT扮祥嫂(左),舉手投足似模似樣。

前無綫資深藝員兼著名配音員馬小靈,三年多前為攝影師丈夫誕下女兒麥可琳。

身兼多職

○一年簽約成為無綫藝員的馬小靈,上EYT扮祥嫂、邵美琪入木三分、演出劇集飾演老師、記者淋漓盡致,轉往配音組期間也作品無數,聲名遠播。三年多前,馬小靈轉型從事地產經紀,憑着流利的英語、國語及強勁的記憶力加口才,成績彪炳,先後獲得「爆數王營業員大獎」亞軍及季軍!

轉型成為地產界女強人,馬小靈同時也是一個女兒的媽媽。○八年九月,她為攝影師丈夫誕下女兒麥可琳(Holami),兼顧家庭與事業,的確吃力非常,她連珠炮發的說:「做地產好淒涼,完全控制唔到自己嘅時間,乜都要就個客,放假都要理,而且壓力好大。囡囡主要交畀傭人姐姐湊,但我一喺屋企嘅時候,個女就一定要黐住我,要我陪佢玩,基本上連揭吓報紙都冇可能!囡囡依家三歲九個月,之前我就係覺得佢開始見到我同老公要返工就喊,所以離開咗大行。依家多數係做熟客,我可以選擇性咁做,想多啲時間喺屋企陪個女。其實不嬲都有人搵我做MC(司儀)同埋廣告配音,依家呢個工作模式,可以畀我接到其他嘢做,之前真係太忙喇!」

馬小靈直言,女兒的性格似足自己,「細細個已經超級『PR』」,經常主動向途人say hi,一點都不害羞,「落到街就好social,聽到音樂就會郁身郁勢,唔覺意望到電視播緊劇集,個主角喺度喊,佢又會喊埋一份,好投入o架,笑到我爆!佢喺屋企真係non-stop,少啲精力都湊佢唔到,好在我有工作,否則做全職媽咪,真係會癲o架!」

為免女兒人細鬼大,馬小靈自她出世不久,便長播益智的英語教育節目,因此,女兒除了英語了得之外,比同齡的小孩子懂得更多生字,三歲便能跟外籍人士暢所欲言,「變相慳咗筆畀小朋友學英文嘅費用,其實愈細個畀佢接觸唔同語言就愈好,佢會吸收得好快,學得好快。」

大施軟功

快將四歲的Holami,自兩歲多便開始上畫班,畫畫天份極高,三歲開始學日文、拉丁舞班,而且每次上堂皆全情投入、樂而忘返,因此,馬小靈形容她是「街精」,「放學後唔使旨意即刻肯返屋企。」她分享經驗說:「試過o氹佢返屋企,話陣間帶佢去上堂,點知佢全日就係咁問我:『乜唔係去上堂咩?』跟住又喊爆,所以同小朋友溝通,一定唔可以順口開河,我個女尤其好記性,又鍾意出街。」

    全站熱搜

    stacylife 發表在 痞客邦 留言(0) 人氣()