克勤與盧淑儀齊齊著上英格蘭波衫襯到絕睇波,不過兩公婆經常掛住香港兩個乖仔,要每日視像會議解相思。

收八百萬為 Now主持歐國盃的李克勤,除擔任首席主持做直播,上週更得 Now厚待,全包豪華宴飛去烏克蘭,與太太盧淑儀現場欣賞愛隊英格蘭大戰烏克蘭賽事,由於以記者身份到場採訪,克勤更有機會近距離睇英格蘭球員賽前操練。做埋七月一日晚冠軍生死戰,克勤便功成身退,稍後將以自由身身份,回歸無綫。

行程緊密

克勤近日擔任歐國盃主持, Now更不惜大灑千萬谷宣傳,單在無綫便落了二百萬廣告費。「今次同 Now合作係開心同舒服,烏克蘭旅程入面都幾 surprise,招呼非常之好,餐餐九大簋,照顧好周到,我哋仲講好如果兩年後嘅世界盃,佢哋攞到播映權,可以一齊再去!」克勤說。
上週日(六月十七日),克勤與太太盧淑儀,聯同高層何麗全,跟大隊一同出發,經土耳其轉飛烏克蘭,由於要坐十多小時飛機,五日行程相當緊密,克勤只觀看了一場烏英大戰。
相比到德國睇世界盃,克勤形容烏克蘭人民生活節奏好慢,觀眾較慢熱,現場睇波唔夠 high。
「佢哋唔似香港,節奏乜都要快,一餐飯食三個鐘,等個湯都要等一個鐘,的確唔係好慣。」

 

逐次計

但身為英格蘭超級 fans,能夠置身 Donbass Arena球場睇波,克勤同太太已經不枉此行,何況今次英格蘭以一比○出線八強,克勤當晚便聯同何麗全等台前幕後,到餐廳慶功至凌晨兩點。
「因為今次以記者身份到場,可以去 Donbass Arena球場,好近距離睇英格蘭整隊球隊操練,只係幾呎距離,真係好開心。」
幫 Now講波,克勤更破天荒與代表無綫做主持的阿叻,兩間電視台連線對話。大台冇「詐型」,全因彼此關係一直友好,稍後克勤會亮相無綫的七一回歸節目,還洽談拍攝音樂特輯。
「其實我而家係自由身,同 Now或者無綫嘅合作形式係逐次計,同無綫做咗咁多年,感情好深厚, anytime嗌我都可以做,但係合約嘅嘢,我唔係咁清楚,無綫同唱片公司係有少少問題卡住咗,我作為歌手,決定權始終喺唱片公司度!」克勤說。

 

stacylife 發表在 痞客邦 留言(0) 人氣()