現代人的安全感是甚麼?銀包有錢?有樓揸手?做一份有滿足感、獲人認同的工作?有自己愛的人、也有愛自己的人?答案見仁見智。

八十後的周柏豪,由模特兒做起,再當錄音室工程師,自己再當起歌手來,然後拍劇、拍電影、演舞台劇、拍廣告,最近更在goyeah.com的微電影《物.語女子》中以由頭帶到尾姿態與六位靚女演六個故事。今年初更奪得男歌手銅獎,與陳奕迅、方大同一起叱咤樂壇。

他自己也直接承認說:「失意……真係坦白講冇乜,唔係話自己好驕傲,而係我好了解自己。入行咁耐,我一定要做到嗰樣嘢,用100%精神做嘅都真係做得到,加上公司配合,傳媒又好錫我,我係正常人唔會撩是非,唔會搞咁多緋聞,所以行條路比較順利。」

早年在爸爸指導下買入一層百多萬的居屋,成功上車,在樓換樓之後已有一層不錯的私人物業。

「有層樓唔代表啲咩嘅,層樓都可以負資產嘅。對於一啲社會上嘅人嚟講有咩咁叻啫?我唔覺得有咩咁叻。只係覺得好有安全感,生活一定要安全感。」

看見把弄着Audi電子車匙的他,我只知我的安全感不夠。

 

鬥做好人

幸好上天待周柏豪不錯,生得一副很多人即使整容也整不出的樣子和身高,讓他先在模界發展,再循序漸進式成為多棲藝人。

「自己會好感恩,但係都要靠努力嘅,呢行靚人實在大把啦。香港冇咩好鬥o架喇,係鬥耐唔衰o架咋嘛!鬥耐冇畀人影到o架咋嘛!(個個都做緊衰嘢?)唔係!我冇做衰嘢o架!邊個畀人影到就賠上個事業o架啦!依家呢個年代個個都有相機、iPhone、微博、facebook、高登,喺街一影到你,一世就係咁o架喇,鬥言行舉止檢點o架啫。唔係話一定冇得返轉頭,要做好多嘢先冚得番嗰件事囉,香港係好笑o架!

「依家做嘅嘢會影響到日後:冇依家,日後會冇進步,遲啲唔再努力啲更加上唔到位,自己所有範疇嘅每一個項目都要做好、學好、搞得好,喺休息時用多啲時間聽多啲歌、寫多啲歌、編曲、睇多啲書、寫好啲詞。

「邊個叫你嗰日瞓多咗兩個鐘?一個禮拜就唔見咗十個鐘,十個鐘可以練好把聲!因為懶,首歌唔好,咪上唔到個榜,首歌咪冇咁hit囉,會知o架嘛!」

小時候的周柏豪(中)笑容可掬,這時他可有想過十多年後一家人會陷入財困?

周柏豪強調自己沒有形象,喜歡娛樂圈的瞬息萬變。

周柏豪曾經在座駕上和鄭融談心被人發現。留意這輛不是Audi。

磚頭最實在

周柏豪不是有錢仔,做事沒有希望一步登天,深明按部就班的重要。

「如果我有幾十億身家我唔做啦,理得你首歌係咪no.1啦傻o架?爸爸聽日買咗個電台佢啦!係咪先?黐線!做乜咁辛苦啫?我會係呢一種人囉!但我唔係(有幾十億身家)嘅時候,要養屋企,屋企又得我養嘅時候,我就要每一日好努力做嘢!」

家人曾經瀕臨破產邊緣,幸好一切事過境遷,他三兄弟正努力給予父母優質退休生活。

「你同我澄清番,嗰啲雜誌成日寫我同屋企人屈喺五百呎單位度,我以前屋企環境都唔差嘅,冇必要五個人迫埋一個五百呎單位。

「我十年冇同爹哋媽咪住,我十七歲自己搬出嚟,一個人都唔止住五百呎啦!依家自己都有層樓,我自己都覺得幾滿足、幾好彩嘅一件事。以前百二萬買到層六百零呎嘅居屋,依家百二萬買到啲咩?」

 

 

微電影《物.語女子》中的周柏豪穿梭多位女孩子之間,包括日光日白和連詩雅激咀,連他也承認自己異性緣比較多。不錯,演舞台劇咀楊淇、演港台劇也和官恩娜有牀上戲份。

隨時候命

周柏豪有碗話碗,有碟話碟,沒有一般常見於無綫小生的扮深邃莫測,矯揉造作。

「我成日都講我冇形象o架!我冇特登塑造自己係邊一個類型,可能大家覺得係型男、係潮星,但我冇特別塑造自己,『我今年嘅目標係要成為潮星!我嘅目標要成為型男!』冇!我平時對朋友係點,對同事或者歌迷就係點。」

曾是香港籃球隊青年軍,不過他深知做運動員不能當飯食。

「好快知道自己唔得囉,因為市場太細,路係好窄,香港唔係淨係馬路吖,成功之路都係好窄,所以運動本身喺香港都唔普及,知道自己發展唔會好大,同埋做運動員會受傷。

「我自己好鍾意好快會變嘅嘢,我唔係好安於穩定,要成日有啲嘢唔同。運動淨係得籃球、練波、射入佢。如果受傷之後就變教波,我身邊好多人因為教波而發達嘅,但我唔係嗰類人囉。

「以前啲運動員邊有人報道嘅啫?以前嘅球星只喺體育版出現咋嘛,嗰個真係球星喇,依家會變成娛樂版嘅球星!

「做藝人係消防員嚟,廿四小時on call,一出去就要成功,冇take 2。要有好好嘅形象、紀律、言行舉止要檢點,仲要PR!消防員其實日日都救火,大家唔會知咋嘛,其實我日日都做嘢!(有咗微博可能會好啲?)『哎!我今日做咗《東周刊》訪問,upload張相先!』我唔會咁。『嗯,等我食個肉醬意粉先!好靚呀!四十八蚊咋!』唔會做呢啲嘢!」

穩陣愛情

除了安樂窩,愛情也給周柏豪安全感。

「愛情都係生命裏幾畀到安全感嘅一樣事情,一定要有!實在囉!等於你做一個歌手有歌迷,唱咗啲歌出去有掌聲返番嚟。愛情過程就係我付出咗,有人愛番你,係相向嘅。」

選伴侶時,無論在評價自己或計量對方時,他有一套性格指引,圈內圈外人的區別反成次要。

「如果對方八八卦卦嘅,圈外人都係死o架!咪會出賣你囉!如果對方唔係八八卦卦嘅正經人家,圈內人都冇事。呢個年代每人都有殺人武器,就係iPhone。哦!佢撩鼻屎咬手指,我影佢upload上網,佢又一世喇,變咗『手指男』!佢條褲有pat屎喺度喎,佢就『瀨屎男』。因為依家太多人唔正經,行內行外都好,好多人會出賣、八卦,價值觀會錯晒。(畀人八卦、出賣過?)呢方面唔評論喇!(過去事無謂提?)冇特別過去!唔會特別評論呢方面!」

轉過頭,他的視線便往他的「殺人武器」上去,先熟練地鍵入密碼,再點、按、拉、掃、推……

登上叱咤男歌手銅獎。「係一個好重要嘅傳媒畀咗個肯定我,知道同以前有少少唔同咗喇,如果承接唔到,就會浪費咗一年人哋畀我嘅機會。」

周柏豪怕做運動員會受傷,所以打消當職業運動員念頭,做model也會老,但他寧願老,也不要受傷。

爆裂

對不少人來說,有車有樓又靚仔的周柏豪,外在條件不錯,

而他應該不甘心做個無餡青年,努力研究寫作和攝影,他認為自己很感性。

「鍾意寫嘢!我鍾意寫歌詞呀、寫啲畀人笑嘅論文呀!多餘嘅!唔係我多餘,

係成個氣候都多餘!好無謂囉,我嘅出發點係我唔開心,見到一啲嘢好靚就寫出嚟,

咁咋嘛,咁就變成咗C1仲要講咗個幾兩個月!無綫新聞報道都要講!

「我又冇咁高深可以去到個位係『我寫篇嘢先!一定中o架喇,人哋實大肆報道!』

我冇plan過!大家畀個咁嘅禮物我可以宣傳到自己幾好吖!三十分鐘咋嘛!

我會繼續做我嘅工作、寫我嘅歌,都係咁o架喇。」

 

除了水杯,周柏豪的「殺人武器」也在一年多前爆裂過,

或因沒有大文豪式文字襯托,沒有回響,只得物主獨自心痛。

爛玻璃可以鎅傷手,也可以送周柏豪一個C1;

用iPhone可以致電情人說:「我好掛住你」,也可知會下屬:「你聽日唔使返工!」

牛肉刀可用來劈友,也可用來切五十蚊坑腩做個清湯牛腩煲。

「其身正,不令而行;其身不正,雖令不從。」道理就是如此簡單。

 

stacylife 發表在 痞客邦 留言(0) 人氣()