揞名爆
媽咪姐一向幾like寶島女歌手「大包」嘅,佢雖然唔係乜嘢絕世大美人, 但成日笑瞇瞇,又真係幾得人鍾意!


不過最近同啲圈中朋友仔飲茶,講吓講吓, 佢哋就開始呻嘞, 話「大包」結咗婚之後,唔知搞乜成個人變晒!明明見佢婚前喺寶島做訪問笑到見牙唔見眼, 講未來老公講得鬼咁冧。好嘞,佢婚後嚟香港做宣傳,大家咪諗住順理成章問吓新婚生活過成點呀,俾佢繼續晒幸福, 讀者又可以感受吓初為人妻嘅喜悅,大家happy啫!點知人算不如天算, 「大包」婚後無耐嚟香港做訪問,一落機就話唔講結婚!唔提老公喎!嘩,成班傳媒一聽到都即刻O咗嘴,心諗:「依家係咪玩呀?」咁,都不特止!呢個初歸新抱接受訪問嗰陣,唔知點解塊面可以keep住係黑色嘅。當攝影師想拍多一兩個角度, 「大包」嘅反應係:「夠了吧!不用拍那麼多啦。」之後就變咗化石咁,郁都唔肯郁!嗯……判案都要聽兩面證供嘅,咁「大包」經理人嗰邊又點講呢?佢哋話,呢位新婚婦人身體唔多舒服,所以狀態不佳。 即係咁,係咪病就無人知,就當你真係病,但病到無時無刻黑面,語氣態度好似人哋得罪咗你祖宗三代咁,又會唔會過分咗呢?大家成年人,自己諗吓啦! ####



 

stacylife 發表在 痞客邦 留言(0) 人氣()