12年 擴胸期練完腹肌,大東胸肌今年再發育增至42吋,佢呢個造型, 如果髹上綠色,就勁似變形俠醫。
亞熱帶 今時今日真正男女平等,男星女星要上位,晒肉無疑是最直接的捷徑,有得露總好過冇得露!初出道是小肥戇男的汪東城,星運平平,惟近年積極修身,榨乾肥膏變鋼條男後,才順利攀上台劇一線小生之位。晒肌有價,三十歲的大東(汪東城暱稱)日日操肌,練成擁有42吋胸肌及麒麟臂的巨肌男,並在近期與韓國女星具惠善主演的《絕對達令》中赤裸上陣。新劇熱爆,承接強勢,大東再接拍與林心如合作的《姐姐立正向前走》,長做長有豬籠入水!

 
台灣興肌男,昔日唔多運動的大東,經過七年操練,由昔日的小肥仔變大隻仔。以前拍劇一定晚晚食消夜的他,不但戒絕消夜,就算忙拍劇,一星期都會抽時間做gym兩次,平日更加係一日一操。大東:「教練話每日要瞓8至10小時,肌肉至可以健康成長,但我冇時間,只好勤做gym。平日我一餐會食兩個飯盒的分量,藉此儲糧,因為拍劇時為了更上鏡,我會每餐控制只食半盒飯,所以惟有靠平時催谷了。」辛苦搵嚟志在食,大東卻反其道而行。他咁辛苦谷肌搏紅,原因是窮過捱過。

 

每月限使千三
據知大東的母親在40歲才誕下他,當時汪父患有糖尿病,汪母則因弱視無法工作,生活困苦。生性的大東,十六歲便開始打工養家,水泥工、搬運工人、派傳單、便利店員、樂園吉祥物統統都做過。英文名叫Jiro的大東後來轉做模特兒,18歲時被唱片公司睇中,將他與陳小春(Jordan)、周杰倫(Jay)並列為「3J計劃」。後來公司捧紅了小春同周董,大東以為有運行之際,卻因為01年911事件打亂了捧人計劃。之後三年,大東無工開兼為父母扛下260萬港元債務,後來捱了三年每月限使千三蚊(港元)的日子,才可以還清債務。所以,為事業戮力操肌,對刻苦耐勞的大東來說,完全無難度。


除了肥肉變肌肉,大東其實都識「變臉」。除咗對眼變大,個樣愈來愈塑膠,下巴亦呈尖削。面部表情少咗,他在《絕對達令》飾演機械人,反而稱職。

追女追足七年
少年又窮又要照顧父母,大東冇錢冇時間溝女,之後演藝事業嶄露頭角,但一溝女就瀨嘢:「女孩要劈腿,與是不是娛圈中人沒關係,我曾與一個幼稚園老師拍過拖,以為她很單純,後來才發現自己原來一直做小三!」因為「童年陰影」,搞到大東放棄「國貨」,轉溝鬼妹,不過都一樣難逃小三的宿命。07年大東拍《惡作劇2吻》時,與劇中擁有烏克蘭血統的女友瑞莎,戲假情真,不過瑞莎本身已經有個半唐番男友。三角戀搞足5年,難得大東依然堅持劇中「阿金」死心塌地精神,被瑞莎呼之則來。上月,瑞莎被發現背住正印男友與大東半夜睇戲,大東更殷勤為伊人攞爆谷、汽水,寃氣變寃孽,難怪睇到大東粉絲眼火爆! ####

 


在now106台熱播中的《絕對達令》,汪東城飾演宅女具惠善的私伙機械人。劇中他有不少全裸鏡頭,雖然拍攝時打晒底,但出街時畫面照打格,勁搞嘢。


在剛煞科的《姐姐立正向前走》,汪東城在公園谷完肌之後,在宣傳活動上,大東又要抱起戲中女友、大過自己六年的林心如,真係少一分力都搞唔掂。


07年 肥仔期在《花樣少年少女》,「死𡃁仔」Ella遇上仲有baby fat的大東,我係Ella都揀劇中又靚仔又大隻的吳尊啦。


09年 修身期拍《愛就宅一起》,大東都試過赤膊上陣,當時佢已經修身,不過就瘦蜢蜢。大東減肥成功,得戚到偷吻女主角楊丞琳。


11年 腹肌期上年拍攝《絕對達令》,由於全劇有大量騷肌機會,大東進一步谷肌,谷出40吋胸肌及腹部八嚿肌肉,化身筋肉人。


大東不但操肌了得,就連畫畫都有一手,佢畫《鐵達尼號》男女主角,都幾似噃。


07年 多表情


12年 硬膠樣


情傾索模自合作《惡作劇2吻》後,汪東城同女主角瑞莎的緋聞已經傳足5年。單是今年4月,汪東城同瑞莎就被傳媒發現三次私會。樣靚身材正的瑞莎,今年又會出全裸寫真救宅男,難怪大東甘心做小三。


《惡作劇2吻》


上月密會

stacylife 發表在 痞客邦 留言(0) 人氣()