「月亮」係行內知名化妝師,大班紅星好似「皇后」同「狂叫」都係熟客仔。之不過,可能「月亮」太熱衷參與「課外活動」,搞到身體差晒,連揸化妝掃都有啲手震,所以依家好多時都係搵徒弟出手, 自己只會喺側邊講幾句,當係口頭指導囉。

 
話說有次「狂叫」去外地登台,叫咗「月亮」去化妝,而實際出手嗰個,當然又係跟「月亮」出埠嘅助手啦。咁「狂叫」都慣咗,無乜所謂,只係趁「月亮」行開,八卦問佢助手呢次出trip有幾多錢落袋?助手答話每日幾百蚊囉。「狂叫」一聽到,眼都凸埋!事關佢大嗱嗱俾幾萬銀化妝錢, 估唔到「月亮」只係將啲「散銀」俾助手,自己仲經常no show走去玩,食水好深囉!一向勇字當頭嘅「狂叫」就拍晒心口同個助手講:你以後過嚟跟我啦!包你人工高福利好,好過跟住「月亮」多多聲喎。嘩!咁筍!媽咪姐都想跟「狂叫」做嘢噃。但「月亮」助手呢,最後都無跳槽。講真,「狂叫」無啦啦咁講, 點知你係咪夾埋老細嚟試佢㗎?況且,今時今日「月亮」仲有啲名氣,梗係跟住佢學多啲嘢儲吓人脈先啦。 ####

 

    stacylife 發表在 痞客邦 留言(0) 人氣()