曾經被邀出席多個公開賽的王馨平,認為打高爾夫球除了講求技術,亦要觀察周邊環境,「天氣、濕度同風向唔同都會有影響,要計清楚。」

今個月,除了五位腌尖腥悶的盛女可以霸佔娛樂頭版外,曝光率緊隨其後的,應非王馨平莫屬。一套《春嬌與志明》,王馨平單單客串一分鐘,加上余文樂和彭浩翔連環惡搞,令淡出多年的她鹹魚翻生, 她說:「真係冥冥中主宰咁,可以突然有咁多人關注我。」其實未踏《春嬌》高峰前,王馨平生活一樣富足,閒時只愛打高爾夫球,她說:「我唔鍾意打牌,唔會成日行街買嘢,咁就自然向咗運動發展,打golf打咗八年,最重要可以學埋控制情緒!」這才是真正活得豐盛。


王馨平01年下嫁從事金融業的Stephen Lee(李嘉輝)後,一度對自己婚後生活感迷惘,「結婚後已經淡出娛樂圈,呢段時間真係冇乜細藝,我唔鍾意打牌、又唔鍾意行街買嘢,咁就自然向運動發展。」

愈打愈上癮
王馨平最初迷上網球,貪其刺激好玩。有朋友早年曾向她推薦高爾夫球,但她隨即耍手擰頭,「我第一個反應係覺得高爾夫球是老人家運動,節奏好緩慢。」不過興趣始終可以培養出來,「有次我同老公去多倫多探老爺奶奶,嗰時天氣好凍,無得打tennis。附近得個室內高爾夫球練習場,咪試吓搵老師教,點知上咗兩堂就上癮。起初好難打,揮桿連個波都掂唔到,我好唔忿氣!」之後她愈打愈順,一打就打了八年,試過多次一桿入洞。

打波練EQ
一般人認為打高爾夫球運動量低,王馨平則稱只屬誤解。「因為基本打18個洞要成4個幾鐘,中間好多高低起伏同好斜嘅路,平時真係要去gym鍛煉。」除了體格健康,她指打高爾夫球亦可控制情緒。「輸波係唔開心,但唔好咁執着。要學識管理自己嘅情緒,因為你會發現喺情緒差嘅時候,真係唔會打得好。」王馨平笑言現時她球技犀利過老公,她甜笑說:「梗係啦!我練得多過佢,佢要做嘢成日飛嚟飛去,邊有時間打。不過佢對我真係好好,同佢一齊打波,即使輸俾我,佢都唔會發脾氣。」
高爾夫球始終是高消費運動,她建議初學者可先買二手球具學習,「二手千零蚊有交易,球具都齊全,網上面或者一啲專門店都有得賣。最貴其實係book場地,私人場地好似愉景灣咁,打18個洞要一千蚊,公眾地方就六百蚊!」她亦建議各位女士打波前做好防曬工作,「我有好多日本朋友除咗搽防曬lotion,仲要搽粉『化行妝』。另外一個貼士,就係打完波,要即時敷個補濕mask。」靚太打波認真多學問。

《春嬌》好帶挈
《春嬌與志明》令王馨平人氣急升,令她在短短一個月內做了至少三十個專訪,出席了三個商業活動,她說:「我初時只係好單純客串拍呢套戲,冇諗過迴響咁大。我睇得好通, 唔會發夢,有導演賞識我嘅話,先再諗繼唔繼續拍戲,但暫時真係未有。」 不過王馨平肯定於6月出書教女性禮儀,「會喺衣食住行四方面入手, 自己會示範啲餐桌禮儀同教人着衫,唔需要45度角。」另外她更密謀年底在紅館或會展開演唱會,「本身冇呢個計劃,但最近好多人問我幾時開騷,大家既然有期望,一定要做。」 ####


王馨平與李嘉輝結婚後試過努力造人, 可惜經歷三次人工受孕也中空寶,「依家真係隨緣喇,生BB唔係話plan就有。」


沙池救波
如果波跌入沙池或水池的話,最緊要在揮桿次數最少情況下,將波打回草地,「如果打到啲沙,波唔會飛得太高,唔可以一下打番上果嶺(球洞所在地)。」


留意草紋
將波打入果嶺通道後,即使球洞近在眼前,也要留意力度,「推桿要睇埋草紋係順草定逆草,順草要細力啲,一大力就唔知推咗去邊。」


量度水平
「推桿之前要伸手度吓,睇吓草地係咪同自己成水平,因為有斜度嘅話,俾嘅力又會唔同。」


親自孭桿
王馨平習慣自己揹袋打波,可以鍛煉身體。「依家通常會有球僮幫手孭,佢會話埋你知打嘅方向。我就鍾意咩都自己嚟,有經驗嘅球手根本應該要自己兼顧。」


除了戴太陽帽和搽厚粉外,王馨平平時亦會戴面罩防雀斑,「揀面罩最緊要堅韌得嚟薄,要夠透氣,遮勻全面,唔好揀中間開窿。」


王馨平06年參加香港團體賽時,一桿入洞令球隊成為冠軍,朋友為她訂造公仔桿作紀念。「後尾先知道我呢球係咁緊要,打完之後團隊列隊咁歡迎我,又開香檳。嗰晚我飲得醉到不得了。」


防曬三寶


《春嬌》票房突破二千五百萬,導演彭浩翔承諾扮王馨平〈別問我是誰〉MV造型,王亦義務落場教蝴蝶手勢。

文章標籤

stacylife 發表在 痞客邦 留言(0) 人氣()