今期前文提到,鍾嘉欣正身在老家溫哥華, 探真正當旺爸爸媽媽哥哥家姐,一聚天倫。前文未有提及的,是鍾嘉欣今次回家還有一項重要任務:「我要搵番我嘅加拿大味!」要「搵番」,皆因失落了。猶記得鍾嘉欣入行初期說話歪炮但清純脫俗;幾年下來字正腔圓了,但那份清純的楓葉味卻漸漸消失天與地。「我覺得自己講嘢粗魯咗,行為港女咗!」 OMG!這怎得了?幸好發現得早,及時來個回家充電,應該可以撥亂反正。「無論我外表點變,心底裏嘅values係一定唔會變!」她說得斬釘截鐵。好,話咁快又即將進入𡃁模索命季節,觀眾也渴望繼續清純只有你。

5%港女
「我覺得我港女咗!」這句說話從鍾嘉欣口中說, 的確幾震撼。想當年華裔小姐個個有姿色有學歷,但隨着年月過去, 葉璇廖碧兒那代已不復當年勇;後起之秀李亞男苟芸慧又未成氣候;能以氣質擔大旗的只剩鍾嘉欣。如今連她自己也自喻「港女」,的確要及早懸崖勒馬。以前的我,斯文到爆燈,說話不會大聲,絕對不會「嗰條友」前、「嗰條友」後。現在做錯事我甚至會講「頂」,一些小朋友fans聽到會大嗌:「啊!嘉欣姐姐你講粗口!」我心諗,「頂」怎算是粗口?Fans告訴我,其他人講當然不算是粗口,但在鍾嘉欣口中講出來,就十分之粗俗。我甚至覺得自己「港女」咗。「港女」的意思?我知,公主病,說話粗粗魯魯呼呼喝喝,性格自我中心,着裙會無啦啦加對吊腳leggings……老實講,我只是說話粗魯了,不覺得自己有以上毛病。但有fans說我已開始有少少港女跡象,大概5%啦!擔心㗎!不是說「港女」不好,但我吸引觀眾的地方,是那種在外國長大的「味」,我很想keep住這種「味」,做回以前那個簡簡單單,開開心心的鍾嘉欣。雖然,我都知好難, 但會盡力。無論如何, 我心底裏的values(價值觀)是不會變。回來香港發展的時候答應過爸爸媽媽,一定不可以變成物質主義,做人亦不可以勢利,否則他們死命都會把我帶返加拿大。看見別人揸靚車、拿名貴手袋,我都會有一秒鐘羨慕,但最多不會超過十秒,我不覺得拿個名牌袋有幾勁。大家放心吧,5%港女啫,應該好容易返轉頭。

新界隻牛
比起初入行時,鍾嘉欣的廣東話的確大有進步, 現在不但會說「拿揑」、「揣摩」這些演員慣用字眼,連「洗板」、「撇」,這些港式俚語也會了。儘管如此,她仍離「港女」很遠。溫哥華出生, 小康之家成長,英屬哥倫比亞大學(UBC)教育系讀至二年級,十九歲前的課外活動,只是每周跟媽媽去唐人街買餸。


華裔小姐勝出之後我給自己三年時間, 做不到甚麼成績就「撇」。當時我真的幾低能,以為用三年時間就能成為佘詩曼胡杏兒等明星,演技也可以有King Sir(鍾景輝)級數。這個圈,原來要浸十年才叫起步,才有資格講演技; 十年以上才叫穩定。我十九歲入行, 廿二歲的時候真的有認真想過,是留,還是「撇」?最後選擇了留, 因為我看到自己的前景幾有希望。大家覺得我乖,不過因為以前的我膽小怕事,基本上很少出聲, 好怕跟人溝通。衣食住行都依賴父母和哥哥姐姐,根本無可能自己一個人生活。來到香港自己一個人住, 我有末期思鄉病,一想起爸爸媽媽便哭…… 初入TVB時甚麼都做, 因為沒有安全感。只有劇接劇地出街, 感覺上有很多「貨」,心裏才好過一些。廿二歲時決定留低,因為經歷了三年之後,已可以自己照顧自己,也識得同人溝通,終於像一個有用的人。當時拍了《溏心風暴》,很多人很喜歡「常在心」,這也是一枝強心針, 我看到自己的前路慢慢被繪畫出來。回加拿大,只能當個小學老師,一定不會如此多姿多彩。 近年有《點解阿Sir係阿Sir》的Miss Koo和《缺宅男女》的關嘉樂,兩個都是很難得的好機會。尤其是Miss Koo,未爆喊前觀眾已十分喜愛,網上留言區經常給我「洗板」。我不敢說自己的演技已拿揑得好好,但起碼叫做有進步。 或許我性格像新界隻牛,只會默默做, 做得多自然容易揣摩。現在拍苦情戲已不用想爸爸媽媽了, 只要「㩒個掣」就能自然流眼淚。眼淚已好像成為鍾嘉欣的標記了, 大家係咪真係唔反感先?只要不令人反感,我都OK,最怕大家覺得我在扮可憐博同情。沒有甚麼哭的秘訣,我不會理自己個嘴有幾歪,對眼有幾「嗡」,一個人不開心的時候個樣怎會靚?我只是盡量投入角色。幸好,我哭起上來不算醜樣。其實我一直都幾清醒,一套劇爆,不等如好有型好勁,腳踏實地慢慢發展才是長遠。娛樂圈永遠沒有穩定的一日, 但so far幾滿意自己目前擁有的。最開心,是自己愈來愈有自信,不再事無大小都驚驚青青。

不要加鹽加醋
「新界隻牛」落入大染缸,雖是錯配, 但在一眾庸脂俗粉中也算另類。鍾嘉欣緋聞算少, 傳聞林峯曾追求她,但自從潘霜霜出現後,我們都知鍾嘉欣不是林公子那杯茶。電影圈也有個伍允龍常與她的名字拉在一起,早前有報紙刊登他們在卡拉OK的合照,力證二人暗交數年。鍾嘉欣純,但不蠢,有些事她不說就是不說。


很多人說《缺宅男女》的關嘉樂是「世紀賤女」,我不太同意。她是有錯,錯在太無主見, 一時想,一時又不想,但不用說成「世紀賤女」這麼嚴重。一個女仔當遇上又有錢又錫自己的男仔時,心動一點也不出奇。但我會比關嘉樂有主見,有婦之夫一定不會掂,女仔的聲譽好重要。感情事我向來低調處理,雖然我從事娛樂工作,但都係打份工啫,希望可以保留自己唯一的私隱。感情事只要跟家人和對方交代已足夠了, 如果要跟大家交代,這會很大壓力。跟Philip(伍允龍)是好朋友,那次他生日,影張相好平常,大家不要加油?加鹽?加鹽落水?(加鹽加醋)對,希望大家不要加鹽加醋。我在圈中很少朋友,李亞男、楊怡、Philip這些都是談得來的好朋友。現在多了馬仔(馬浚偉)和夏雨爸爸囉!

大熱
不說感情事, 但畢竟是女兒家,對婚姻生活也是期待的。「我一定會結婚生仔,偶像係陳慧琳,好羨慕佢人又靚事業又好,又有家庭。佢從來都冇負面新聞,形象好健康。」鍾嘉欣對陳慧琳情有獨鍾,皆因當年選華裔小姐時,評判之一的陳慧琳說了一句:「好鍾意鍾嘉欣,佢笑容好甜。」她才成為大熱。「選華裔小姐時從來冇人留意我,一單新聞都冇, 即係代表我唔靚啦!以為自己輸梗,自信心跌到零。Kelly講一講之後我突然變成大熱,自信心返晒嚟。佢可能已經唔記得我,但呢一句話,我銘記於心。希望我將來都可以做到佢咁有成就。」娛樂圈要是再多幾個陳慧琳鍾嘉欣,也真的不嫌多。


鍾嘉欣當年參選時表演呼拉圈舞,另一評判歐陽震華給她滿分。「Bobby話好耐未見過咁健康同得意嘅舞。」 ####


《當旺爸爸》在復活節炮灰檔平均也有三十點收視,算不錯的了。


《缺宅男女》被封「世紀賤女」,網民也實在太肉緊了。


Miss Koo喪喊一幕出街後鍾嘉欣被捧成視后大熱,最後輸給胡杏兒。這行, 點都要論資排輩。


○七年的常在心,鍾嘉欣被封宅男女神。「今時今日再叫我演常在心一定不及當年,唔係話我已經『變壞』,人長大咗,廿八歲永遠唔會再有廿二歲嘅sweet。」


人大了,就要做大人的事。最近冧莊為詩琳拍纖體廣告,首次「開胸」。「我覺得自己成熟咗,可以一試。」


鍾嘉欣口中的媽媽,是大美人。「媽媽係郭羨妮同關詠荷混合體,靚過我五倍!」


「我細個係『一嚿飯』,返香港前從未去過旅行,連滑雪也未試過。」


○七年拍《十分愛》時遇上伍允龍,傳緋聞至今。兩人一時是暗交,一時又說已分手,撲朔迷離。


《蘋果日報》圖片

stacylife 發表在 痞客邦 留言(0) 人氣()