紅要有代價, 崔始源嘅代價係每日健身練胸肌同腹肌。

中國十三億人口,一人掟一蚊你使都發過豬頭,因此微博呢個龐大嘅宣傳渠道,經已唔係中港台明星嘅天下,就連韓國一班偶像都要加入戰團,請槍手搵翻譯發中文微博。人氣組合Super Junior成員之一崔始源,就狂post牀照俘虜粉絲。韓圜貶值, 人仔升極仲有, 呢條路,佢哋揀啱咗!

崔始源 人氣最強
26歲嘅崔始源開微博只有三星期,但已經吸到45萬粉絲,而且佢嘅微博, 經常性惹嚟成萬粉絲轉發,真係一「發」不可收拾。呢個韓仔好襟撈,除咗自爆行蹤同寫咗一句「最近我開始學習中文,為了你們……」冧粉絲之外,佢每逢瞓醒同臨瞓前有都鋪晒牀照癮,粉絲唔癲就假。

張根碩 出動毛毛
憑韓劇《原來是美男》喺大中華爆紅、今年24歲嘅張根碩,近年就以中性妖媚嘅形象闖蕩亞洲,令佢喺微博累積咗270萬粉絲,數字驚人。呢位花美男嘅微博貫徹佢又妖又姣嘅形象,除咗發放同性牀照外,就連剪髮嘅髮碎都擺上網任睇,務求用毛毛引爆遐想。

朴敏英 淑女風情
無綫J2台近日熱播《成均館緋聞》,隨即令女主角朴敏英人氣飆升。今年26歲、戲劇學系畢業嘅朴敏英,發微博就冇崔始源咁進取, 一批早前喺意大利旅行影嘅淑女相最悅目,不過佢就喺微博寫「我最近學習漢語!很難」冧粉絲。咁勤力,現時有89萬粉絲嘅佢有望上試百萬。

李多海 騎呢睡衣

07年憑《大話妹》響朵嘅李多海,最近就到內地同鄭元暢拍新劇《愛的蜜方》。賺人仔賺到笑嘅佢,喺微博回饋佢280萬名粉絲,除咗自發騎呢睡衣look外, 仲附上幾段長篇大論嘅中文字微博。唔理佢用邊種翻譯方法, 呢份誠意真係值得讚。 ####


上周崔始源雖然身在巴黎, 但依然一日發兩轉微博。


張根碩喺微博寫韓文,一班唔識韓文嘅粉絲又點知咩呢?所以即時發番個中文版補鑊。


同男人瞓埋同一間房都話幸福,係張根碩先夠膽講。


朴敏英喺《成均館緋聞》中女扮男裝,令佢成功上位。


為咗打入強國, 朴敏英去完意大利後就立即搵老師教中文。


李多海只得27歲,但呢個睡衣look令佢老咗幾年。


李多海喺微博踢爆導演教講中文粗口。



    stacylife 發表在 痞客邦 留言(0) 人氣()