我係咁識嘆㗎啦,鬼叫我係一姐咩!(設計對白)

早幾日復活節假期, 媽咪姐同唔少香港人一樣外遊嘆咗幾日, 但食買玩之餘媽咪姐都有做嘢,就係順道去片場探下班, 八下有乜過癮嘢。


媽咪姐今次去嘅係上海松江區車墩影城,唔去猶自可,入到去見到個個熟口熟面。原來無綫新劇《名媛望族》開緊工,劉松仁同五位「太太」韓馬利、陳玉蓮、江美儀、楊怡、賈曉晨仲有同劇嘅馬國明等日日都由朝開到晚。


話明《名媛望族》,梗係女人戲啦,劇情係點仲未知, 但戲外淨係睇幾個女人嘅比拼已經好精彩。大家咪以為年資愈耐愈有派頭,實情係三十出頭嘅「四太」楊怡最「疊馬」,事無大小都有三名助手貼身侍候,出出入入例牌有人擔遮不特止,無論斟茶遞水定補妝抹汗,完全唔使勞煩自己纖纖玉手,呢啲咪係一姐風範囉!反觀其他「太太」只係獨來獨往,連櫈都要自己拎呀,陰功!所以話啫, 做「四太」唔緊要, 得寵咪得囉,我哋香港賭王一家都有辦你睇啦!

同場加映:馬仔玩死人
4月9日《名媛望族》拍攝片頭,個個上馬之後係威係勢,但實情係啲馬仔唔係隻隻咁聽教聽話,有啲仲發老脾,搞到一班演員鬼咁尷尬。 ####


擔遮楊怡要專心背劇本,梗係要有人擔遮啦!


挽袋藝人返國內拍戲請助手通常一個起兩個止,楊怡請足三個, 去到邊都浩浩蕩蕩咁, 好架勢。


把守去廁所都有兩人在外等候, 仲有一個去咗邊?梗係入咗去幫手啦!


馬國明同JJ賈曉晨都係自己拎櫈同挽袋,全程冇人幫。


蓮妹(左)同Mary姐(右)大楊怡一截都唔使擔遮,一姐係特別錫身啲。


楊怡時時刻刻都有助手擋駕,相反馬明就極之親民。成班妹妹仔任影唔嬲,有女fans見到偶像仲激動到喊(小圖)!馬明你搞喊人喇,衰豬!


蓮妹右手拎櫈左手又要顧住個小手袋,媽咪姐提議楊怡借個助手幫下人。


「老爺」劉松仁原來好鬼馬, 鍾意拎住部iPhone周圍影, JJ影一餐,古董車又影一餐。梗係啦,松哥同好多後生演員一樣,好鍾意玩微博㗎。


咁多人服侍,媽咪姐好羨慕呀!


石修隻馬行行下忽然發老脾,工作人員捉都捉唔住,修哥立刻醒目地跳落地,有驚無險。


蓮妹可能對動物敏感,上馬後鼻水狂流,要猛用紙巾捽鼻。


朱晨麗隻腳擘到差唔多一字馬都上唔到馬,真係超尷尬。



stacylife 發表在 痞客邦 留言(0) 人氣()