曾江腳震震老婆撇甩

贊助商連結

八十三歲嘅曾江(Ken哥),講過話自己永不言休,只要一日仲做到,都會繼續演戲做落去。早前,佢拍一套內地電影《忘憂酒吧》,仲拒用替身,由自己親身上陣吊威吔,吊上半層樓高拍一場戲,專業精神可嘉之外,老當益壯,東姑都戥佢開心。之前,佢因為痛風,行動不便坐住輪椅拍無綫節目《4個小生去旅行》,o依家睇嚟身體好番晒。

不過,東姑早前喺九龍城遇到Ken哥同Ken嫂焦姣。現場所見,佢雙腳似乎就冇想像中靈活,行路仲要趷下趷下,一路行一路腳震震咁,可憐焦姣仲唔係咁體貼,全程蹺埋雙手,冇話扶下照顧下老公,自己健步如飛行前,老公就畀佢丟低咗經常大墮後,好吃力先追趕到老婆。

而且,兩公婆年紀都唔細喇,過馬路都唔打醒十二分精神,竟然貪一時之快,見到綠公仔就打斜角橫過兩個燈口。一把年紀行得慢,而啲燈又轉得快,其實幾危險;見Ken哥「論論盡盡」咁,東姑都替佢「牙煙」。其實,敬業樂業,做嘢拍戲就話瞓身搏命啫,平時行街又何須咁搏?Ken哥真係要錫住自己喇!

Ken哥同Ken嫂焦姣,可能太過老夫老妻,出街都各有各行,冇乜傾偈交流。

 

焦姣蹺埋手,好唔體貼,冇扶下或者照顧下隻腳有事嘅Ken哥。

 

兩公婆見到綠公仔,打斜行,橫過兩個燈口,似乎唔係咁守交通規則噃。

 

焦姣一馬當先過馬路,Ken哥就跟喺尾,一路行、一路腳震震。

 

步履不穩嘅Ken哥,一路追趕住老婆嘅背影,睇嚟好似好辛苦咁。

 

早前,Ken哥開心嫁女,佢同前妻鄧拱璧所生嘅囡囡曾慕雪,喺國外舉行婚禮。

全站熱搜

tvb4life 發表在 痞客邦 留言(0) 人氣()