幕後玩家

贊助商連結

大台近期熱播劇集《幕後玩家》,三位公關主角非富則貴,既揸林寶堅尼超跑,更霸氣到用成疊金牛掟人,有錢、有女又有面!

現實中,見盡社交圈人和事的名公關丁子高、侯維德和鄭紹康,則聲言要做一個成功的公關,要日日孭住個「忍」字做人,他們更曾因為牌子搞活動後的傳媒報道版面較細,而被客戶鬧到狗血淋頭。要做「真.幕後玩家」,你估真係話咁易?

 

 

丁子高:「唔妥」都要一攬泯恩仇

Collaboration group公關市場策劃公司老闆丁子高,這天埋位拍攝前,急急換上客戶品牌的首飾和服裝,他說:「個客想我戴,要幫幫手!」客戶是米飯班主,丁子高向來識做,就算見到「唔妥」的人,他同樣可以做到面面俱圓,「即使唔妥大家,見到面攬一攬咪當冇事囉,呢啲唔係叫虛偽,只係將令人尷尬嘅局面變得緩和啲,係友善嘅虛偽。做公關要宏觀,睇四方八面,並以大局為重,如果所有嘢以自己角度出發,唔會做到成功嘅公關。」

贊助商連結

丁子高的身份特殊,太太是歌手楊千嬅,可以經常以夫妻檔上陣,行家見到,自然份外眼紅,「佢(千嬅)係我老婆呢個係事實,所以我仲要更加謙虛,唔想令人覺得我好了不起。好多時對面公司以為我爭生意,其實係啲客主動搵我,人哋唔知亂講,會影響我公司聲譽。(敵對公關)喺背後講我唔係問題,如果五成係真加三成幻想都算,如果全幻想就好過份。試過喺活動前一星期,被另一公關唱,話我搶生意,其實嗰個項目我已經傾咗一年,嗰次我真係有啲唔開心,但無辦法,唔通唱番人咩?」

丁子高由歌手轉營做公關已經十二年,見盡不同的人和事,不時要做拆彈專家,少啲EQ都唔掂。他曾遇過客戶,講明活動要做報紙的娛樂頭條(C1)和雜誌封面,可惜結果事與願違,被惡駡一頓,「客戶有要求,我只可以盡力去做,但唔係我哋可以全部控制,出來效果未如理想,(客戶)會打嚟鬧我。」

除了作為客戶和傳媒的橋樑,有時還要貼身侍候出席活動的紅星,鬥智兼鬥力。「有次請咗一位韓星出席商場活動,臨上台前十分鐘,佢先話唔做傳媒訪問,好彩記得份合約有寫明,我即刻搵個同事print出嚟畀佢睇,有證有據,佢先唔可以話唔做就唔做。」不過有時遇到麻煩事,亦要硬食,「有次邀請一位港星到外國出席活動,不嬲喺酒店房叫room service都無上限,但佢叫咗一支八萬蚊嘅紅酒,個客知道咗即刻牙痛咁聲向我詐型,我都冇辦法,以後惟有set番上限。」唔好問邊位!做公關要保密,密密實實。

丁子高講到今年得意之作,是替美心開設中秋節主題Pop-up Store,他們包辦構思至製作一條龍,不時邀好友撐場,更廣發電話宣傳訊息,遠至美國的親友都收到。

 

在五年前,他開始轉營做埋市場策劃一條龍,中、港兩邊做,「公關工作只佔公司嘅40%,o依家世界唔同咗,要轉型至得,要為客戶提供更多推廣服務。」

 

鄭紹康:有乜閃失入晒我數

在公關界打滾二十多年的天機公關CEO鄭紹康(Francis),每年負責的中港項目多達二百多個,身邊更不乏名人、紅星和富二代的朋友。他坦言,多年來抱住一個「忍」字做人。「張繼聰喺劇裏面講得好o岩,做PR真係要日日孭住個『忍』字喺身。我哋嘅工作其實係一個下把位,好多時夾喺客戶同傳媒中間。以何家(賭王何鴻燊)千金為例,好多報紙雜誌都想搵佢哋做訪問,不過佢哋唔係本本都做,當我哋去幫佢哋婉拒,傳媒一定入晒我哋數。」

講到搞活動時被嘉賓放飛機、遲到、臨時加價和辱罵,Francis坦言統統領教過。「記得2012年喺尖沙咀搞十大傑出衣着活動,當日其中一位富二代得獎者遲遲都未到,我打電話畀佢同佢秘書都唔接電話,直至開騷前十五分鐘,佢秘書先回覆話臨時有事嚟唔到,最終嗰年只得九個得獎者。

「嘉賓遲到亦不時發生,記得有年又係十大衣着,好多朋友都知Fanny(薛芷倫)出席活動,要花好耐時間裝身,加上嗰次佢坐咗架時速只得十公里嘅老爺車嚟,搞到全場人等佢一個。咁我咪打電話催吓佢囉,可能語氣重咗啲,佢聽到即好晦氣咁同我講『嚟緊喇!』。

「有次Fanny仲試過即場『開我波』o架!話說之前廚神Gordon Ramsay嚟香港,一早講明唔同人影相,但你知啦!一有呢啲外國名人嚟,個個阿太都爭住要影相,後來經過我多番周旋後,Gordon Ramsay終於係同三個人影相,當中冇Fanny份,佢就即場發我脾氣,不停鬧我,話我同佢咁friend,都唔帶佢入去影相,鬧咗我大半個鐘,最後我要送咗本Gordon Ramsay親筆簽名嘅書畀佢先收到科。」

Francis直言搞一個活動,好多事情要兼顧,更要有幾手準備。「有次請韓星出席一個活動,大家一早傾好晒價錢,點知活動前三日,韓星嘅經理人打來話要加多三十萬酬金,當時我真係諗到頭都爆,因為客戶一定唔會再加錢,咁惟有同個客解釋,推薦其他嘉賓畀佢,最後搵咗另一位韓星頂上,拆掂咗。做PR好多辛酸嘢,只有自己先知。」

做得公關每日都可能會遇到不同的難題,即使難受,面對客人也要時刻保持笑容。

 

鄭紹康近年為本刊撰寫專欄而人氣急升,除了富二代好友,亦不時訪問時令紅人,今年八月便訪問有神奇小子之稱的亞洲拳王曹星如。

    全站熱搜

    tvb4life 發表在 痞客邦 留言(0) 人氣()