最美的時光 惠英紅

贊助商連結

入行四十一年、五十七歲的惠英紅說,將上映的新片《Mrs K》,是她最後一齣動作片了。

「真係唔再拍啦!我已經拍咗咁多年打戲,傷咗無數呀!有啲傷係復原唔到,有啲就算醫好咗,都變咗舊患。而且拍打戲,錢又唔係特別多,甚至比其他嘅仲要少,哈哈哈!我做乜仲要咁傷害自己嘅身體啫?」

查實,小紅姐過往已明示或暗示過不知多少次,不想再拍打戲了,可是,不想拍、不想拍,最後觀眾還是會看到她繼續在大銀幕上揮拳踢腿。而這次,她卻由「唔想拍」,變成了「唔再拍」,一錘定音!

 

 

「我本身個心好軟呀,有時去到片場,佢哋(臨時)加咗啲動作戲俾我時,我係唔開心o架,但我唔想難為大家,唔識點推,咁是但啦、食咗佢啦!o依家我逼自己做咗呢個決定,咁樣講咗出嚟,再有呢啲劇本搵我呢,真係唔好為難我啦!哈哈!」

贊助商連結

更重要的是,這齣片是她打得很滿意的作品。「一來、呢齣戲嘅導演何宇恒,係我好信任同好鍾意嘅導演;二來、我睇番呢齣戲,我真係打到一個水準,係o依家冇乜後生會打到咁。如果我繼續拍動作片呢,呢一、兩年我可能仲打到呢個水準,但都會差好多,然之後呢?喂!阿婆打交,你哋都唔想睇啦!係咪先?哈哈哈!

「我拍動作片起家,既然係咁,我不如將呢套打得最靚、劇本又好嘅一齣戲,當做我動作片收山之作啦!」更何況,成就這「最美的」,過程並非人咁品。

 

 

動作片

拍動作片,是小紅姐的專業,所以「動作片」這三個字,她絕對有資格解讀。「好多人都搞錯咗,槍戰、追追逐逐、揸槍、避子彈、碌兩碌就叫做動作片,但我嘅準則裏面,呢啲並唔係!因為所謂嘅動作,係要打到我以前拍嗰啲戲嘅level,真係會拍到受傷,所以我諗一般演員都唔會想拍,而我自己亦都已經打唔番我以前嗰個level。」

她的確很堅!拍這齣動作片收山之作《Mrs K》時,即使已年屆五十五歲,她還是會在開拍前特訓三個月。「我埋位前已經知道啲衫(戲服),冇得畀我墊pad,所以我惟有強化我啲肌肉,嚟保護我啲筋骨。嗰三個月,我每日要訓練四個鐘,一個鐘做瑜伽、一個鐘做gym,再做一個鐘瑜伽,最後游一個鐘水。

「我年紀大,要應付咁多打戲,自己冇信心呀!我做body check,啲骨已經薄咗——唔係疏鬆,已經叫好好,但係要碰碰撞撞,都好易出事o架嘛!」

其實,當然,有些鏡頭是可以找替身幫忙的。「我頂唔順o架!好多時我一睇個mon(拍完即場睇play back),踢嗰吓啲力度同感覺,都唔係我啲嘢,咁不如我自己打番!

「你話嘞,我對自己要求高到咁,我仲點拍落去啫?」

 

拍動作片多年,傷患早已遍布全身,令她成為了醫院和診所的常客。「我啲骨只係薄咗,唔係疏鬆,其實已經好好!但始終年紀大,身體唔到自己話事,我對拍打戲已經冇乜信心。」

 

小紅姐近日為香港著名藝術家又一山人的《Moving On 57x57》相展,在香港不同地方,拍攝了一輯甚具美態的照片,當中她少有地擺出不同的舞蹈甫士。

 

在《Mrs K》中,小紅姐跟馬來西亞影帝Faizal Hussein有不少對打場面。「佢拍開文藝片,第一次拍動作戲,拍完都話慘!哈哈哈!」

    文章標籤

    惠英紅

    全站熱搜

    tvb4life 發表在 痞客邦 留言(0) 人氣()