Nano S Vs EnVizion 360手機全景拍住上

贊助商連結

無論手機鏡頭有幾靚,想玩近年熱爆的360全景相,點都要加裝360 Cam先至拍得到,所以不少廠商都加推專為手機而設的360全景相機,一插機底即可拍出有趣的球形靚相,邊捽芒邊擺上網呃Like。今次搵來新一代Insta360 Nano S以及Huawei EnVizion 360比併,睇吓邊款先至係全景之王。



今次以Insta360 Nano S及Huawei EnVizion 360比併,睇吓邊款先至係全景之王。

Nano S進化登場

Insta360向來主力研發手機360 Cam,新抵港的Nano S可說是上年Nano的進化版,以Lightning插頭兼容iPhone手機。雖然外形同上代冇乜分別,但勝在畫質大躍進,支援3,840×1,920@30fps的4K靚片;還加入新功能如全景直播等,畀KOL作360度網上直播之用。而且新機結合手機和App實時防震技術,即使邊行邊拍都能保持穩定。

EnVizion 360的骰小巧

Huawei於上年10月在德國發布的EnVizion 360,可說是廠方首部自家360 Cam,最近正式在港開賣,以USB Type-C插口及轉插兼容Android手機。最大賣點是僅重30g,的骰小巧方便隨身攜帶。機身配備兩支210度魚眼鏡頭,提供透視圖、魚眼視圖、小行星及水晶球4種模式,玩法都算齊全。


Nano S
售價:$1,999(a)

EnVizion 360
售價:$1,228(b)
第一回合:鬥成像畫質

揀360全景相機梗係「畫質先決」,Nano S標榜支援3,840×1,920@30fps拍片畫質,另可拍攝約2,000萬像素全景相片,試拍出來的影像相當銳利,放大後連主體臉部細節都睇得到。至於EnVizion 360則支援1,920×960@30fps拍片和約1,300萬像素全景相片,雖然解像度不及對手,但影像色彩亦算豐富,人臉膚色忠實呈現,可說各有千秋。


Nano S可以影到4K影片和約2,000萬像素的全景相片,放大主體後依然細緻。

EnVizion 360只拍到全高清片和1,300萬像素相片,幸好人像膚色還原度高。
第二回合:鬥App功能

Nano S能夠配對《Insta360 Nano S》手機App,除了提供女士至愛的美顏功能和濾鏡特效之外,亦新增全景視頻通話功能,可對應WhatsApp、Line、WeChat等玩360度視頻,並可選擇多種畫中畫(MultiView)模式以多視角展現影像,每個畫面都可各自碌住嚟睇,四周環境一覽無遺。至於EnVizion 360的《HUAWEI 360 Camera》手機App,基本功能都算齊全,例如調校曝光、白平衡、濾鏡等,亦能夠以魚眼、小星球等不同效果預覽影像,惟冇得玩全景Live直播略為失色。


《Insta360 Nano S》新增全景視頻通話,仲可以玩畫中畫睇到唔同角度。

《Insta360 Nano S》手機App可透過Facebook、YouTube等社交平台直播。

《HUAWEI 360 Camera》手機App的功能略為大路,拍攝時能調校曝光、濾鏡等。

《HUAWEI 360 Camera》拍攝後可將影像分享到Facebook、Twitter等,可惜做唔到全景直播。
第三回合:鬥安裝便利

針對iPhone而設計的Nano S,本身內置800mAh電池能夠獨立使用,不過最麻煩係插上手機時,用家必須先除去手機保護殼,而且開App時間較長,大約需要等10秒先入到介面。相反採用USB Type-C插口的EnVizion 360,正反兩面插都冇問題,更附有不同轉接頭,大部分Android手機都用得到,安裝時又毋須拆去手機殼;加上一旦接駁到手機,便會即時自動開App,反應夠快。再者佢由手機供電,完全唔使考慮電量問題。


Nano S採用Lightning接頭,僅對應iPhone使用,不過安裝時必須拆去保護殼。

EnVizion 360用上USB Type-C接口,由手機供電,一插即會自動開App。

想玩盡360 Cam進階功能可揀EnVizion 360,初接觸全景相機的話可選Nano S。
總結 :Nano S功能進階 EnVizion 360適合新手

今次Nano S和EnVizion 360兩機分別對應iOS和Android手機,可說迎合不同平台的用家要求。不過Nano S的定位較為進階,唔單止可拍4K片,仲做到360全景直播甚至視頻通話,市面上暫時只有佢先做得到。而且新增的畫中畫功能亦相當好玩,但對方都要下載相關App先玩得到。至於EnVizion 360嘅安裝和玩法都較為簡單,適合初接觸360全景相機或者預算不多的入門用家,做到基本影相拍片和分享。

Nano S規格表:

鏡頭:210度×2

影片畫質:3,840×1,920@30fps

相片畫質:約2,000萬像素

電池容量:800mAh

體積:110×33×21mm

重量:約66g

EnVizion 360規格表:

鏡頭:210度×2

影片畫質:1,920×960@30fps

相片畫質:約1,300萬像素

體積:37×36.8×26mm

重量:約30g

撰文:黎子豪

攝影:陳世昌、郭凱敏

模特兒:Long Ling(Reborn Production)

查詢電話:(a)3520 3538、(b)8128 8810

    全站熱搜

    tvb4life 發表在 痞客邦 留言(0) 人氣()