陸永獲「大王」愛的抱抱

贊助商連結

無綫嘅《萬千星輝頒獎典禮》即使已經結束,但係餘波未了,中途仲有一段小插曲,好受到大家嘅關注,就係陸永喺台上疑似「寸」咗陳百祥(叻哥)一句:「你喺謙虛呢方面都幾囂張!」搞到叻哥當場黑面。事後,既傳陸永畀TVB照肺,又話隨時「雪藏」佢。不過,陸永同叻哥就先後回應咗絕無其事,仲話叻哥冇咁小器,未有怪罪陸永喎。

今年頒獎禮,東姑都有喺現場,喺鏡頭後面見到好多觀眾見唔到嘅盞鬼嘢,o依家一次過爆!好似陸永咁,東姑就留意到佢「寸」完叻哥,入咗後台一陣,出番台前時,神色好似仲係驚魂未定,可能心底都怯怯哋自己「寸嘴」得滯,激嬲叻哥啦!搞到司儀界算得上大師兄、有「大王」之稱嘅安德尊,即刻上前安慰佢,兩個吱吱斟傾完一輪密偈,「大王」仲大大力畀咗個「愛的抱抱」佢,以示支持。

另外,東姑發現咁多獎之中,攞「飛躍進步女藝人」獎嘅麥美恩(Mayanne),雖然年資較淺,但好多人都真心戥佢高興,睇嚟佢人緣真唔錯。好似劉佩玥咁,東姑就「裝」到佢專登坐埋入記者席睇實Mayanne捧獎,仲睇到眼濕濕,絕對係真情流露。仲有,李司琪同埋鮑起靜,雖然都一把年紀,但係司棋姐原來超貪靚,不時匿埋後台玩「港女」自拍。至於鮑姐就仲犀利,原來佢有大班包含老中青嘅粉絲,為數唔少得過啲當家花旦添。

陸永疑似呢一幕「寸」叻哥「寸」出事,不過叻哥事後解釋黑面係「交戲」,根本冇嬲。

 

出番台前,驚魂未定嘅陸永,畀「大王」捉住吱吱斟傾密偈。

 

睇陸永個款,似係為自己一時口快快解釋,而「大王」就好言安慰番佢。

贊助商連結

「大王」仲畀陸永一個「愛的抱抱」;不過,「大王」個樣笑得就有啲蠱惑啫。

 

Mayanne攞獎時,劉佩玥就坐埋入記者席,見證好友嘅歷史時刻;佢仲情不自禁睇到眼濕濕。

 

司棋姐擔正嘅《溏心風暴3》,雖然喺頒獎禮捧蛋,但係一啲都無損佢嘅雅興,自己匿埋後台,擺晒港女十式甫士玩自拍,認真貪靚!

 

鮑姐原來好多內地「鐵粉」,仲要唔少係「八、九十後」嘅後生仔女添。

    全站熱搜

    tvb4life 發表在 痞客邦 留言(0) 人氣()