Natural Born Choker 謝賢

贊助商連結

四哥謝賢這天乘坐謝霆鋒年前送給他代步的五百萬勞斯萊斯,抵達專訪取景的酒店,才步出車廂手插褲袋走進大堂,四周便突然靜止了下來,把焦點都集中到他身上去;繼而各人紛紛舉起手機,對着他拍片的拍片、拍照的拍照,「謝賢呀!」、「四哥呀!」之聲此起彼落,巴啦巴啦,十多廿個手機鏡頭,就這樣一直沿途對着他,直至電梯門關上。
在電梯內,同行的都讚四哥剛才很有大明星風範,他托托太陽眼鏡,報以一聲冷笑:「係咩?」

畢竟他自一九五三年入行,至今六十四個年頭,這種騷動場面,他早已見怪不怪了;更何況,他今天即使已年屆八十歲,但依然keep得住身形高大健碩,依然留長頭髮束起小辮子,依然carry到一身白馬王子look配襯淺粉紅色西裝,徹頭徹尾都是萬人迷一個,有魅力是梗的,難怪他有份參演的《賭城群英會》播出後,很快便成為焦點。

贊助商連結

「我永不言休o架嘛,但我又唔係一定接拍o架喎。之前都有好多劇搵我,但做好少(戲份)、客串吓,我唔想做,咪推囉。但呢套呢,阿晶(王晶)係我老友(王天林)……個仔,咁咪拍吓囉!總之我鍾意就得啦,哈哈哈!」

舉手投足都是甫士,說話談吐都是態度,如果形容霆鋒chok,其實四哥更加chok,而且更是chok在骨子裏那種,一切出於自然。

 

 

年屆八十,仍然keep到健碩身形,四哥說,全靠在家裏做倒吊機,以及每日做push up所致。「唔keep住,啲肌肉會墮晒落嚟,所以我o依家仲有波波!」

 

倒吊養生

四哥生於一九三六年七月三十日,換句話還有不足一個月,他便已經八十一歲了,可是他得天獨厚,幾乎沒有脫髮、甩牙這些年邁的特徵。

「頭髮,係我媽媽留畀我嘅。我老竇六十幾歲已經光晒頭,一早已經冇晒頭髮;但係我媽媽一百零二歲死嗰日,啲頭髮仲多過我!至於啲牙呢,就有真有假,我叫做keep得好好o架啦,最緊要係清潔啦,又食煙又盛,臨瞓前都唔刷牙嘅,乜都死啦!」

再看看他的容貌,皺紋不算多,最厲害是兩邊面頰一點也沒有鬆弛,橫看豎看,亦不似打了botox。「梗係冇(打)啦!嗰啲根本同啲細胞都混合唔到!我屋企有部倒吊機,好嘢嚟o架!好多人都頂唔順,但我o依家每次都吊到十五分鐘!我哋(呢個年紀)啲血行得慢o架嘛,但一倒吊呢,啲血『嘭』一聲咁衝落嚟,呢度(指指臉龐)都實淨啲o架!

「我上年拍戲(《賭城群英會》)撞車,撞傷咗第九節肋骨,醫生話個人會縮,我真係矮咗兩分!好彩我有玩倒吊機,先拉番鬆咗,你睇我o依家坐得幾舒服,行路幾快!大佬,我咁嘅年紀(仲可以keep到咁),我自己都好滿意o架!」

 

 

在劇集《賭城群英會》中,飾演隱世賭神「向無名」,延續了多年前《千王之王》「羅四海」的風範,令他成為此劇焦點。

 

年輕時的四哥,是電影界當紅小生,由於長得高大靚仔,故多在戲中飾演情聖角色。而現實生活中,他亦是萬千少女偶像,經常畀女圍。

    全站熱搜

    tvb4life 發表在 痞客邦 留言(0) 人氣()