康莊大道 夏永康

贊助商連結

要成功,不但只享受掌聲,更要接受批評,如果能在人生中遇到不同的伯樂,更是踏上康莊大道的法門!

現年五十三歲的夏永康(Wing Shya),由寂寂無名的小子,搖身一變成紅爆名人圈的神級攝影師,除了歸功於他多年的付出,他坦言更要感謝身邊出現過的每位伯樂。「好感恩可以入到商台工作,因為當時商台俾咗好多機會我;我亦好感激葛民輝同林海峰,令我走進攝影嘅世界;仲有王家衛,帶我走進國際。」

成名以後,找他拍照的紅人排山倒海,包括張曼玉、梁朝偉、舒淇、「萬人迷」碧咸等,李澤楷還找他影全家福;李嘉欣、郭富城則指定要他拍婚紗照⋯⋯足見其江湖地位,舉足輕重。

由「土炮」攝影師到國際知名,夏永康坦言自己夠運,希望外界多加尊重創作人。「創作人背後好辛苦, 捱更抵夜,為咩啫?都係想得到人嘅讚賞。」

 

鏡頭外的巨星

訪問這天,來到夏永康位於柴灣的影樓兼工作室,這裏布置簡約,只放有不同的攝影器材,但他拍過的巨星作品則一張也沒有,室內只充斥着濃濃的雪茄味。未幾,頭髮長得有點凌亂的主角,由工作室慢慢走出來,並體貼地問:「你哋要唔要飲嘢?」

他說話率直,訪問期間流露不少真性情,不時夾雜着強調語氣的「助語詞」。入行多年,作為攝影師,夏永康笑言自己從不以貌取人,「我唔鍾意比較邊個演員好啲,因為每個人嘅氣質都唔同,就算對方再差,都總會有佢好嘅地方。而且拍攝時我唔會主動要求佢哋擺pose,如果次次都由我講,即係重複;反而佢哋想點就點,我就會自己慢慢觀察後再加變化,咁先好玩。」他抽着雪茄說。

多年來與不少巨星合作過,他坦言最欣賞張曼玉的多變。「同Maggie(張的洋名)合作,每次都有新鮮感,因為佢係電影人,又對時裝好有觸覺,經常喺無計劃之下,一齊諗出新意念。好似佢見你有條頸巾,就夠膽即席拎嚟配搭,效果又出奇地好。」

多年來,能令夏永康留下深刻印象的,絕不只張曼玉,還有中國名模杜鵑、藝人舒淇、湯唯和鞏俐等,他坦言每人各有特色,當中還有去荷李活發展已久的Maggie Q。「記得有次同佢去河內拍嘢,影相前一晚佢仲去玩,我就叫佢唔好玩咁夜,佢竟然同我講:『其實你影相啲style都係要啲model攤喺度,我飲夜啲,咪仲有mood!』,當時我真係俾佢笑鬼死,所以每個同我合作嘅藝人,都好清楚自己同我想要啲咩。

「國際明星就每個都唔同,好似碧咸就最清楚自己嘅拍攝角度,我試過同佢影相,只係撳咗一張就搞掂。不過我最欣賞都係Tilda Swinton(蒂達史雲頓),有次同佢去咗一間上海舊式麻雀館拍攝,我叫佢扮一隻鬼,佢真係七情上面,又喺人哋後面睇人打牌、扮偷聽、耍太極、瑟縮喺樓梯底,簡直喺度做緊戲咁,搞到我都影到毛管戙,真係好厲害!」

在眾多合作過的巨星中,他表示最欣賞張曼玉,〇四年二人在桂林拍了一輯照片,並於〇六年在日本東京六本木森美術館舉行的攝影展中展出。

 

早年鄭秀文擔任英國品牌Aquascutum的廣告形象大使,特別找夏永康為她掌鏡。

    全站熱搜

    tvb4life 發表在 痞客邦 留言(0) 人氣()