黃淑儀老人院送暖

贊助商連結

一代無綫花旦嘅黃淑儀(GiGi姐),除咗演得之外,仲係廚藝高手,煲湯煮嘢食絕對難唔到佢,而最難得嘅係,佢利用呢對巧手做義工。

早前,GiGi姐就同埋慈善團體「同理心」,仲有著名嘅「鏞記酒家」攜手,參與咗一件好有意義嘅活動,就係親身去到老人院舍,喺今個冬天送上暖笠笠嘅臘味飯畀一班老人家,令寒冬都變得好溫暖!

值得一提,臘味飯有GiGi姐「教路」,加入咗啲獨特竅門,整出嚟特別軟熟,尤其適合老人家嘅胃口,可見GiGi姐份人幾咁細心。再加埋「鏞記」嘅馳名鵝肝潤腸落去,香噴噴、色香味俱全,睇到東姑都流晒口水。

GiGi姐喺現場仲同「鏞記」第三代掌舵人甘蕎因,chit chat下交流整嘢食心得,同埋分享下做義工嘅樂趣。最緊要梗係關心、問候下啲老人家啦,見班「老友記」個個食到舔舔脷,同埋有GiGi姐陪佢哋傾下偈,梗係開心滿足到個個笑到見牙唔見眼啦!

GiGi姐同一班「老友記」都好好傾,不時關心佢哋嘅身體,以及問候近況。

 

睇嚟老人院啲「老友記」,都認得GiGi姐係公仔箱嘅明星,見到佢仲開心到見牙唔見眼。

 

雖然簡單一碗臘味飯,但背後有GiGi姐嘅關懷同埋愛,倍感溫暖。

 

派畀老人家嘅臘味飯,有GiGi姐教路,煮得特別軟熟,佢仲落手落腳親手「裝」飯派發。

 

現場GiGi姐同「鏞記」嘅第三代揸fit人甘蕎因,一齊傾下講下,交流煮嘢食同做義工嘅心得。

    全站熱搜

    tvb4life 發表在 痞客邦 留言(0) 人氣()