河國榮難忘初戀匿埋喊 焦媛:我有戀父情意結!

贊助商連結

藝人焦媛與河國榮首次合演舞台劇即熟稔非常,預告二人會有親熱場面之餘,更雙雙自爆情史。焦媛笑指自己對初戀兼現任男友高志森一見鍾情,而河國榮則表示為首位女友的離開而喊足幾星期。



首次合演舞台劇的焦媛與河國榮,默契十足。

焦媛即將與河國榮合作演出舞台劇《我愛比爾》,故事講述80年代上海女生戀上外交官的一個淒美愛情故事,劇中略有火辣場面。今次雖是二人首次合作,但默契相當,受訪拍照時「打情罵俏」。問到焦媛為何「睇中」河國榮?她坦言:「當然以前有睇過佢嘅舞台劇演出,而今次我哋要搵個識講流利廣東話嘅外籍人士,所以非佢莫屬,我諗住下次就同佢合作演音樂劇。」

「喜歡就會極力爭取」

至於一人分飾四角的河國榮對演戲素有熱誠,他說:「焦媛扮演嘅上海女生先後同四名外國人發生感情,我就一個人扮演晒四位外籍人士,想喺對白、舉動上都有分別,等觀眾睇得清楚啲,例如其中一個角色我會只用一種聲調講對白。雖然我跳舞冇焦媛咁叻,但兩星期前開始節食減肚。」


焦媛攬到河國榮咁實,唔驚高志森呷醋咩?

焦媛毫無保留自爆情史。

對於愛情,焦媛直言自己的態度與今次角色很類似:「都係嗰種喜歡就會極力爭取嘅性格。(過往多人追?)講出嚟都冇人信,我拍過一次拖咋!(即係對高志森一見鍾情?)第一眼覺得係呢個囉,咁都Feel到佢有意思,我有戀父情意結o架!」

太太想免費學英文?

河國榮則難忘初戀,他說:「18歲嗰年喺澳洲嘅女友舉家搬去第二個地方生活,當時正值聖誕,我就匿埋喊足幾個星期,女友最終梗係冇咗!」雖是外國人,惟他內心性格傳統似中國人﹕「愛情唔會主動出擊,怕畀人拒絕,又驚畀朋友笑。(點追太太?)佢本身係我學生嚟,可能佢想跟我免費學英文啦!不過佢個算盤打唔響,因為我咁耐以嚟淨係講廣東話!」他直言未有打算返回澳洲生活:「30年前嚟香港,我放棄晒所有家當嘞!不過爸爸已經75歲,身體唔係幾好,農曆新年後我會返去同佢過生日、探吓佢。」

文:影視組

    全站熱搜

    tvb4life 發表在 痞客邦 留言(0) 人氣()