林作媽媽 淘桃居

贊助商連結

港姐冠軍麥明詩的大律師男友林作﹙Joe﹚,上周宣布不做大律師,要轉行做藝人,並作多線發展搵銀,林作的媽媽王莉妮解釋:「唔會可惜,佢大律師資格仲喺度,當佢做完佢想做嘅嘢,隨時都可以再執業做番大律師。」

林作媽媽是生意人,投資出手快、狠、準,去年十二月搬入中環半山區的三千七百呎複式新居。她直言新居既旺事業又旺桃花,非常完美。以為「完美」自然價值不菲,但全屋華麗傢俬埋單只需三十萬元,「我係生意人,成日中港兩邊走,全屋傢俬都係淘﹙淘寶﹚返嚟,香港買要一百萬,自己淘,慳好多錢。」

林媽媽在同一大廈買入兩個單位,自己住在複式單位,裝修設計,由自己話晒事。住另一單位的林作沒有參與意見,林媽媽說:「我得一個仔,梗係黐住個仔,佢就算成家立室,我哋都可以成日見到,大家又有自己空間。」

 

客飯廳的主調為米色系,配以深啡色的電視櫃和長餐枱,三張大梳化的布局,是典型的大屋設計。

 

母子開拖

林媽媽王莉妮去年初豪擲6,500萬元,買入中環半山區一個三千七百呎的複式單位,又在其他樓層買入另一單位,給兒子林作作結婚新居。

林媽媽更做埋室內設計師,將中西意念融合,屋內既有西式家具,又有中式家具。她分別在香港和深圳揀傢俬,最終決定在淘寶搵平貨,全屋傢俬連運費只是三十萬元,膽大的她完全不怕貨不對辦,「跑馬地傢俬舖啲傢俬咪又係東莞運落嚟,客廳盞大吊燈喺香港買要萬幾蚊,淘返嚟只係二千零蚊;裝修一個浴室所有設備連瓷磚,只係萬零蚊,價錢平香港一半。我搵個相熟嘅裝修師傅,手工只係百幾萬,全屋裝修埋單唔使二百萬。」

她一臉無奈,續說:「不過Joe對我好大意見,又話呢度『娘』,叫我將三張梳化,掉咗其中一『嚿』,我梗係話唔得啦!間屋我住,最緊要我鍾意。」

原來林媽媽和林作不是同居,林作住同一大廈的另一個高層單位,訪問當日,林作路過探班,他無奈說:「我對呢度完全冇意見,千祈唔好話我喺呢度住,我同我媽無論政見、價值觀都唔同,我鍾意北歐式傢俬,唔使貴,Ikea都好好。我要求簡簡單單,最好間屋要家徒四壁、無多餘擺設、唔造作,好過o依家佢咁樣搞。」

新居位於半山,她特別安裝了一個電火爐,冬天一室溫暖。

 

金石是朋友送的入伙禮物,代表有靠山,有利做生意。

 

好客的林媽媽,分別設有中式﹙上圖﹚、西式﹙左圖﹚的飯廳,食中餐、西餐都可以用不同的餐枱。

    全站熱搜

    tvb4life 發表在 痞客邦 留言(0) 人氣()