宣萱第十隻愛犬離世 心碎眼紅紅

贊助商連結

藝人宣萱、歌手菊梓喬(Hana)及資深音樂人黎小田昨日到電台出席中學生聲演比賽。出名愛狗如命的宣萱強顏歡笑,談到狗狗時眼紅紅,難過地表示前晚自己飼養的十歲唐狗過身:「之前已經走過九隻,今次係第十次,未試過咁突然,係我第一隻狗自己選擇離開,之前每一隻都係幫佢哋打針決定安樂死。」她前後養過十一隻狗。



宣萱憶述愛犬離世經過時,坦言個心好唔舒服。

照X光發現腫瘤

宣萱只會收養流浪狗或從動物組織領養,從不花錢購買寵物,近年更積極宣揚領養中年狗,她說:「呢隻係我第一次領養嘅中年狗,希望市民會選擇領養呢類狗,佢哋因為年紀大,被領養機會好微,想鼓勵大家唔好淨係要狗仔。我冇後悔畀到呢隻狗四、五年好開心嘅生活。」個性強悍的她在憶述愛犬離世經過時難掩哀痛,坦言心情尚未平復:「心裏面唔舒服,每一次都好唔開心,但會過渡到。有一晚我半夜返去發覺佢有啲唔妥,佢突然間好似想搵窿捐咁,我知唐狗如果知道自己要走就會想匿埋,半夜帶佢去急症睇唔出啲咩。第二朝我突然扎醒,聞到一陣狗或者人將要離去時會發出嘅氣味,好強烈,我就起身打開門,佢瞓喺我門邊,從來冇試過,佢見到我之後仲發羊吊、周圍撞,再去照X-ray發現有個腫瘤,已經冇嘢可以做到,十幾個鐘之後去咗。身邊朋友都好好,即刻出嚟陪我傾偈。」

養狗經驗豐富的她表示要慢慢丟淡愛犬離世一事,但仍願意再領養,直言「有生之年幫到幾多得幾多」,現階段擔心家中另一隻狗,她說:「依家返到去間屋突然靜咗好多,屋企仲有一隻好慘,因為佢哋好Friend,我哋返嚟話佢知嗰隻走咗喇,佢今日仲係好愁好唔開心,惟有攬佢多啲,錫佢多啲。」


菊梓喬自爆讀書時期怕醜,好驚畀人聽到自己把聲。
菊梓喬怕醜學生妹

此外,同場的Hana則自爆讀書時期好怕醜:「我好驚畀人聽到自己把聲,覺得上台表演嘅中學生好犀利。」黎小田認為同學表演的時間太短:「同學仔表現都幾好,但一分鐘太短喇,有抑揚頓挫就冇咗故事嘅起承轉合,同埋咁短嘅嘢就背咗佢喇。」正籌備農曆年初二及初三開紅館騷的他,表示已經準備得七七八八,但新年後未可休息,因要繼續錄製音樂節目。

文:音樂組

    全站熱搜

    tvb4life 發表在 痞客邦 留言(0) 人氣()