小不點 何遠東

贊助商連結

「真係好開心!好感動!」就如很多在幕前打滾了多年,終於得到外界認同或認識的演員一樣,何遠東在訪問中亦說了這句話N次。

的確不難明白其感激和興奮之情,皆因可以在《心理追兇Mind Hunter》當中五集「殺阿媽」戲,得到網民注意兼一致激讚,機會率確是比中六合彩還要低。「播呢個故仔初頭,啲人喺網上勁鬧:『做乜要我哋睇呢個肥仔呀?』後來播到第九集、第十集(殺阿媽戲肉),好多人都話:『原來呢個肥仔做戲幾好喎!』跟住網上就愈嚟愈多人談論我,又開始有好多傳媒搵我做訪問。」

忽然成為了新上位焦點,東東形容,那幾天有點精神衰弱、不知所措,「嗰幾日我直情fragile到,訪問一掂到我啲死穴:老師、屋企人同阿姨,我啲眼淚就『啤啤』聲走晒出嚟!」

落到屋企樓下,又多了大埔街坊以「東東」、「文哥」(《心》劇中名字)來稱呼他。「以前佢哋只係叫我『肥仔』,突然得到咁多街坊支持,我諗我要去選區議員,佢哋應該會投我一票,哈哈!」

他不求這剎那光輝可以永恆,只求此後有更多戲可以讓他發揮。「我自己知自己事,我呢啲冇樣嘅,唔賣戲,唔賣可愛,賣乜啫?唔通走偶像派咩?o依家有認同,我已經好滿足,只係希望之後會再有咁好嘅角色畀我做,就算得幾集都好!」

是真的,無綫的劇集,往往就是因為有這種實在的演員,才更添質感和戲味。

開道門

何遠東生於一個幸福的家庭,「我屋企唔係有錢,爸爸做廚師,媽咪都有嘢做,我對上只有一個家姐,所以我好幸福,幸福到同阿爸阿媽講,我想入演藝(學院)讀戲劇,佢哋諗都唔諗就話:『你去啦!』」

他從來沒有明星夢,對戲劇有興趣,只不過是中一時的一次好奇。「有次經過課室,見到啲人坐晒喺度,我戇居居就走埋入去,介紹埋自己,點知第二日睇notice board,1A班嘅何遠東就入咗戲劇學會。」

然後,他遇上了好老師,開啟了他走進戲劇界的那道門。「當時有一位叫秦鳳英嘅老師,佢好好,介紹我讀演藝。我考到入去之後,讀五年,頭兩年我差啲畀人踢咗出校,好彩係伍潔茵老師幫我開咗竅,所以到o依家,我都好感激呢兩位老師!」

○八年演藝臨畢業時,因為一個showcase,東東便被無綫選中。「個showcase請咗好多老細嚟,其中一個就係無綫,見完,第二日就叫我去casting,跟住就話要簽我。我問我班主任羅冠蘭,佢話:『都冇損失嘅,反正香港只係得一個電視台咋嘛!』哈哈!」

 

 

從出世起,東東身形一直份量十足,小學時期的他(左),跟同班同學合照,亦很明顯大一個碼。「我小學時已經百幾磅!」

 

○八年演藝畢業,爸爸媽媽和家姐到場觀禮。「我由本來差啲被踢出校,跟住因為有老師開我竅,後來我仲攞埋獎學金!」

    文章標籤

    小不點 何遠東

    全站熱搜

    tvb4life 發表在 痞客邦 留言(0) 人氣()