【日本見學】390円親手包裝信玄餅 山梨工場食見玩

贊助商連結


信玄餅外表,細細件再夾住個黑蜜膠樽仔。

可能香港人一聽信玄餅會唔知係乜嚟,但係我相信大家都一定有見過!一粒粒好似糯米糍咁嘅甜味年糕,上面沾滿晒黃豆粉嘅日本傳統和菓子就係信玄餅喇!相傳喺戰國時代,大名武田信玄喺行軍打仗嘅時候會用年糕加上糖做緊急食糧,後來大家為咗紀念佢,就將依樣食品命名為信玄餅啦!

 

桔梗信玄餅工場 製作包裝任你睇

今次要同大家介紹山梨縣笛吹市嘅桔梗信玄餅工場。呢到有得睇信玄餅嘅製作同包裝過程,另外仲有得試吓自己自己包裝(當然仲可以帶返屋企啦)同食信玄餅甜品𠻹!

 

參觀信玄餅工場

一嚟到信玄餅工場嗰陣,第一個感覺就係,好~大~啊~仲估唔到咁細件嘅信玄餅,原來係用咁多咁巨型嘅機器整出嚟嘅!從玻璃窗上望出去,可以見到一粒粒已經調咗味嘅年糕經過運輸帶,送到去一個個裝滿黃豆粉嘅鐵盤。工人就企定定喺個鐵盤側邊,不停地將黃豆粉撲上年糕上面。另外一邊就見唔到工人嘅身影,淨係得啲機器夾住個膠樽仔,逐個逐個轉去裝黑蜜!最後一件件信玄餅同一樽樽黑蜜都整好晒之後,兩樣嘢就會送到旁邊嘅大工場比工人做最後嘅包裝,見到佢哋平均5秒鐘就包好一粒,好犀利!


工場內有完整製作同包裝過程供參


機器與人手合作的製作流程。


親手包裝信玄餅活動!仲有得成盒信玄餅帶走。

親手包裝信玄餅

喺信玄餅工場依到,只要畀390円就可以試吓親手包裝一盒4件嘅信玄餅。工場員工會親自教你點樣包,睇落好似好簡單,不過想包到好似佢地幾秒就包完一粒簡直係不可能嘅任務(笑)。以咁平嘅價錢就可以試到包裝體驗,仲有得成盒信玄餅帶返屋企,真係非常抵玩!

 

必食超人氣桔梗信玄餅軟雪糕

呢度嘅桔梗信玄軟雪糕係桔梗信玄餅工場嘅超人氣甜品,一日可以賣成2000杯咁多,真係唔係講笑!除咗原味之外好受歡迎之外,仲有戀之抹茶味。兩款雪糕配上煙韌嘅信玄餅同黑蜜,黃豆粉香、年糕煙韌、雪糕軟滑,冇得頂啊~~~


黑蜜味桔梗信玄餅軟雪糕。


戀之抹茶味桔梗信玄餅軟雪糕。

桔梗信玄餅工場テーマパーク
山梨県笛吹市一宮町坪井1928
見學時間:9:00~16:00

採訪:Mika@like japan
攝影:Kelvin、Heiman@like japan
製作:喜愛日本 like japan

    全站熱搜

    tvb4life 發表在 痞客邦 留言(0) 人氣()