呢張尋人 poster圖文並茂,仲加埋爆花,債主都幾好心機,幾落力追數。

中環人語

搏一搏,摩托變番單車

贊助商連結

搏一搏,單車都變摩托!不過睇吓賭王副身家,就知道幾多人過完大海,摩托變番單車之餘仲輸埋!最近有賭仔被指輸凸走數,仲開晒名喺 WeChat「通緝」,唔單只佢身份證、地址,連結婚相都貼晒出嚟,實行起底追數,連老婆都拖埋落水。走數賭仔叫陳豪(唔係沖咖啡嗰個),英文名 Bunmi Somkhit,唔知咩國籍人士。呢個陳豪老婆叫劉一霏,係二○一三年溫哥華落選華裔小姐,一五年開咗間中源資本有限公司,公司地址喺中環廣場四十三樓。

 

 

據 WeChat講,呢個陳豪今年七月曾贏二千八百萬,但後來倒輸四千六百萬之後玩失蹤。陳豪原本租住山頂盧吉道 34號單位,業主係香港老牌地產商協成行方潤華家族,上年五月盧吉道 34號俾三個賊人爆竊,工人聽到聲大叫嚇走佢哋,只係唔見咗一隻價值廿五萬名錶,嗰陣有消息指做保險嘅女戶主姓劉,同媽媽、老公和兒子一齊住。小宗上協成行個網站望一望,見到個單位依家招緊租,三千呎四套房連天台,月租十六萬元,睇嚟前租客已搬走咗。債主喺實體地址搵唔到人,惟有用網上社交媒體尋人囉!


陳豪(右一)俾債主起底,唔單只拖累家人

 

連一班姊妹團、兄弟團都無辜受害。

「高科技」無人便利店
內地流行唔帶現金出街,叫雞都可以電話過數。根據劇本,咁去便利店都唔使店員喇啩。嗱,內地第一間無人便利店,今年十一月初喺深圳灣天虹總部大廈開業,小宗去觀摩,正好進行裝修,於是去另一間屬體驗性質的無人便利店。
行到店前,便利店道門鎖住,如果要進內,就要先掃描在門口的 QR code,再實名登記成為會員,門就會打開。內裡貨物與一般便利店無異,零食、飲料、水果,以及日常用品如絲襪、眼罩都有。選購商品之後,將它們全放在收銀台下方的「結算區」位置,系統便會「橫掃」所有商品上的條碼並顯示總價格,最後再用手機掃描顯示屏的 QR code俾錢。俾完錢,道大門自然就會打開。成個過程,無店員、亦不涉現金交收。
店外仲有塊板,顯示麵包喺五點後會變半價,呢個位置先顯示番內地現實嘅特色,因為掛上板嘅牆身,又殘又污糟呀!


只要把所有貨品擺放在收銀台的結算區,顯示屏會自動顯示總價格。

 

深圳首間無人值守便利店十一月初開幕。

曾蔭權連環運滯
網上好多人關心一歲女童小予恩,事關她膽管閉塞,本月八日喺瑪麗醫院做肝腸啓合手術後,在普通病房一度心跳停頓,予恩腦部受損或影響未來四肢活動能力。小宗祝福小予恩早日康復,而喺呢個時候,竟然有政界嘅人流傳,佢嘅主診醫生係前特首曾蔭權大仔曾慶衍?
小宗睇睇曾慶衍 profile,佢中學去咗英國升學,九九年英國布里斯托大學醫科畢業,回港先後喺伊利沙伯、廣華及瑪麗醫院實習。○三年與同是瑪麗醫院醫生的莫蔚淇結婚,○七年晉升為外科高級醫生,一○年再升做副顧問醫生,現時正在瑪麗醫院肝臟移植中心,擔任肝臟移植外科醫生。
不過小宗託記者問過小予恩家屬,佢哋表明主診醫生無人姓曾,呢次應該係誤傳。其實曾慶衍過往都捲入過懷疑醫療事故,一二年瑪麗醫院懷疑一名病人患膽管癌,建議切除右肝,手術由曾慶衍執刀,但術後化驗報告顯示事主並無患癌,只是肝有疤痕才有陰影。咁啱同一科今次都捲入事件,曾蔭權家族近年都好運滯喎!


曾蔭權長子曾慶衍(右二)被誤傳是小予恩的主診醫生。

 

好多市民在 Facebook為小予恩打氣。

新地多謝光大改「勞稿」
老牌土炮券商新鴻基金融近日鋪天蓋地賣廣告,宣傳佢哋正式改名「光大新鴻基」,以示公司控股權易手。呢單刁兩年前其實已完成,當時光大證券以約 41億向新鴻基公司( 86)買入新鴻基金融,業界都話新鴻基可以咁高價賣仔,絕對係大贏家。
查實單刁仲有一個冇金錢瓜葛嘅贏家,登登登凳,就係大藍籌新鴻基地產( 16)。一直以來,好多人都誤會兩間公司有好密切關係(包括好多年資尚淺嘅財記),事關佢哋公司個「勞稿」一模一樣。
有咁特別嘅情況,因為六十年代人稱「三劍俠」嘅馮景禧、郭得勝及四叔李兆基共同創立新鴻基公司,之後佢哋分道揚鑣,馮景禧獨自成立專做證券的新鴻基證券, 83年上市後再賣盤俾李明治家族。實際兩間公司大纜都扯唔埋,弊在個「勞稿」相同,所以郭家惟有「孖屐亭」叫自己做「新地」區分。
幾年前新鴻基金融搞出迷債風波,更被證監會譴責,據聞新地當年因為呢壇嘢,覺得無辜影響公司形象,曾考慮過點可以唔會躺着亦中槍,不過郭老太對公司個「勞稿」好有感情,最終冇咗件事。
線人話如今新鴻基金融改名又改「勞稿」,新地高層不知幾咁開心, 2018年願望應該係「新鴻基公司」都一併改名。

新鴻基金融正式改名「光大新鴻基」,連「勞稿」都轉埋,新鴻基地產唔怕俾人誤會佢哋有關係啦。


 

 

六十年代人稱「三劍俠」嘅馮景禧(左起)、郭得勝及四叔李兆基共同創立新鴻基公司,之後馮景禧獨自搞新鴻基證券,但郭老太對公司「勞稿」好有感情,所以改「勞稿」一事不了了之。

手機熒幕大王鍾情觀塘磚頭
上星期觀塘區業發工業大廈 2期進行強拍統一業權,以底價十六億二千萬元成交,買家正正係擁有八成業權嘅伯恩光學創辦人楊建文。
或者好多人唔識楊建文係乜水,但肯定見過佢公司產品,事關伯恩係全球最大手機熒幕生產商,蘋果大部分手機嘅熒幕都係由佢哋供應,今年福布斯話佢身家超過六百億,第一次打入香港富豪榜即排第八。
楊建文係真香港人,都有買磚頭嘅習慣,佢鍾情掃觀塘區工廈和商廈,依家公司總部亦喺觀塘,樓下有幾層商場收租。而今次強拍嘅業發工廈,正正喺佢公司斜對面,步行兩三分鐘就到。
有地產代理話楊建文只用咗三年,已經收夠業發八成業權可進行強拍,原因就係手爽出價高。聞說有業主企圖吊高來賣,以為可賺到盡,點知楊建文已收夠籌,最終強拍呎價,比之前收購價仲要低。


伯恩光學創辦人楊建文(左),福布斯估計佢身家超過六百億元。


撰文:宗菁華

centralman@nextdigital.com.hk

tvb4life 發表在 痞客邦 留言(0) 人氣()