陳凱琳廿四孝老竇侍候

贊助商連結

陳凱琳(Grace)同鄭嘉穎發展「父女戀」,男友年紀足足大過自己廿二年,好多人話「老夫嫩妻」配搭,女方會特別得到男方嘅呵護同埋照顧。東姑就猜唔透Grace同嘉穎屬唔屬於呢種,不過,在家佢又真係好得到Daddy嘅呵護,陳父當正佢如珠如寶,因而有戀父情意結,亦一啲唔出奇。

早前,東姑見到Grace 做完一個宣傳活動,Daddy又全程做佢嘅「柴可夫」,揸車接載佢離開,然後一齊去到尖沙咀一間酒店,約埋媽咪一家三口,同埋Grace嘅經理人歎下午茶。

東姑所見,陳父對個寶貝女認真錫到加零一,出入幫囡囡拉門,食嘢負責埋單;之後,送埋阿女返無綫電視城開工;而落車時,仲見Grace手上打包多兩大盒西餅,應該係請一齊開工嘅同事食,相信都係佢位廿四孝Daddy負責找數。陳父將Grace當正公主咁侍候,睇怕做得佢男朋友,嘉穎點都有啲壓力喇!

Grace有個好爸爸,陳父仲做埋乖女嘅「柴可夫」,喺宣傳活動之後,車佢去酒店開餐,阿女當然笑開顏。

 

陳父對寶貝女Grace呵護備至,仲幫囡囡拉埋門添。

 

Grace連父母加經理人,一行四人開餐歎下午茶;席間,東姑見佢十足開籠雀,話題多多。

 

媽咪嘅美貌遺傳晒畀Grace,陳母保養得宜,兩母女驟眼睇好似兩姊妹。

 

陳父全日做乖女嘅司機,最後仲送佢返電視城開工;而Grace就買咗兩大盒西餅,返公司請同事食,張單當然Daddy找數。

 

鄭嘉穎與Grace上月十指緊扣出席陳嘉寶嘅婚禮,呢對「父女戀」依然好恩愛。

全站熱搜

tvb4life 發表在 痞客邦 留言(0) 人氣()