吳業坤「扮豬」搬九龍塘豪宅

贊助商連結

吳業坤(坤哥)屋邨出身,來自單親家庭,入行之前家境都幾坎坷,曾經攞過綜援。不過,自從彈起之後,佢歌影視三棲發展,仲猛接商演廣告,豬籠入水,難怪山雞變鳳凰。

之但係,人紅自然是非多,坤哥都好怕畀人話佢一朝得志,所以,平時唔敢太過招搖,點知咁先出事,又畀人話佢扮豬食老虎,封佢做「偽毒坤」添!

好似早前咁,東姑就喺土瓜灣一棟工廠大廈,見到坤哥揸住架五十萬嘅新車,似係上去做嘢。不過,唔知搞邊科,落車時騎騎呢呢,夾張紙巾喺眼鏡同鼻樑之間,當戴面罩咁遮住自己副尊容,以為低調,點知仲不倫不類,搞到仲引人注目,似乎又係唔衰攞嚟衰嘅又一事例。

嗰晚,佢做完嘢過海落灣仔,去咗一間平價菜館,似係約咗朋友開餐;而架車仲貪平兜咗幾個圈,泊喺街邊表位,睇嚟佢都仲「貼地」而且慳家嘅。飯後,佢就揸車到達九龍塘,東姑見佢入咗廣播道一個豪宅屋苑,跟住就成晚冇離開,相信上址係佢新居。呢度一來近仲住喺樂富公屋嘅媽咪,可以得閒返去飲下湯;二來大個仔又搵到錢,「升呢」下啲居住環境,都好應該。不過,坤哥屋邨搬豪宅呢單嘢,佢都一直保持神秘,似乎又係刻意低調、低調、再低調喇!

坤哥騎騎呢呢,落車夾住張紙巾喺鼻樑,以為遮住個樣,反而仲惹人注目,連看更叔叔都忍唔住

 

屋邨仔出身嘅坤哥,知慳識儉,兜圈都要搵位泊街表,平好多。

 

之後,佢一個人入咗去灣仔一間平民菜館食飯,相信係約埋朋友喺度開餐。

 

最終,坤哥返咗去九龍塘廣播道一個屋苑,原來搬咗去豪宅都冇話畀人知,認真神秘。

 

雖然呢排荷包腫脹,但係坤哥生活「貼地」,繼續幫襯便利店買嘢飲。

 

全站熱搜

tvb4life 發表在 痞客邦 留言(0) 人氣()