2腫瘤擴散 愛犬Cash垂危 鄺美雲哭崩:牠送給我14年快樂時光 

贊助商連結

相識是緣份,何況是相伴共度十多個年頭的愛犬。

被鄺美雲﹙Cally﹚視作兒子的愛犬Cash,近日先後發現左腎及胰臟長出腫瘤,體重由10kg暴跌至只剩5.6kg,上周六更突然不吃不喝,氣喘不停,Cally傷心得馬上放下手頭工作,送牠進寵物醫院。

經醫生檢查後,發現Cash身上腫瘤的癌細胞已經擴散至全身淋巴,病情並不樂觀,更因缺氧而需留醫ICU觀察,靠氧氣箱幫助呼吸。

虛弱的Cash看見Cally,即使渾身無力,仍努力睜開雙眼,面對此情此景,原本強忍着淚水的Cally,也忍不住崩潰痛哭,「加油呀乖仔,多謝你呢十四年,帶俾我好多快樂時光。」

Cally在寵物醫院,看着接受深切治療的Cash,軟弱無力地躺在氧氣箱裏,不禁哭得雙眼通紅。

 

體重急跌

Cash自一個月大開始,便融入鄺美雲的家中,而Cally一直視牠如親生仔看待,十四年來讓牠食好、着好、住得好,加上年年驗身,健康情況一直唔錯。對於愛犬病情突然急轉直下,她坦言一時三刻難以接受。

她在寵物醫院探望完Cash後,拭去眼角的淚水說:「兩三個月前發現佢牙仔痛,帶佢去睇醫生,當時醫生同佢檢查完,都話冇事,健康指數好靚;但十月中再去睇,就驗到佢左腎附近有個腫瘤。之後Cash身體開始轉差,原本鍾意喺屋企蹦蹦跳嘅佢,成日都好似好攰咁,體重更由10kg跌到5.6kg。直至上周五,見佢開始唔係好行到,到周六更唔肯食嘢,於是馬上送佢入醫院。照完MRI(磁力共振)發現胰臟仲有個腫瘤,癌細胞更擴散咗,醫生都叫我要有心理準備。」她說罷即雙眼通紅。

一向身體健康的Cash,上月檢查時突然發現左腎附近有腫瘤,上周再發現胰臟亦有一個腫瘤,癌細胞更迅速擴散,現需靠維生指數監察儀觀察病情。

 

 

 

Cash習慣睡在Cally牀邊,「上周五早上我臨出門口,同佢講:『你笑俾媽咪睇吓?我知你好攰……』佢聽完,真係咪咪嘴咁笑一笑,佢真係好乖……」

 

無牌醫生

Cally看着病危的Cash,回想起○三年六月帶牠回家,自此便一起歡度了十四個寒暑,「母子情」一日比一日深厚。

她憶述,Cash自半歲起便隨她四出行善,「Cash半歲開始做狗醫生,由無牌行醫,到一歲成功考到狗醫生牌。佢好有靈性,見到啲婆婆同BB,會主動去錫吓人哋。試過有次一日要去探訪四間護老院,人走幾場都攰啦,何況係狗仔,但佢好犀利,去到每間護老院都表現得好精神,不過每做完一個探訪,上到車就攰到馬上瞓着。」

在Cally心中,Cash是隻精靈活潑且善心滿載的小狗,過去十四年種下唔少福德,「記得○八年我哋去佛誕嘉年華做義賣,善信捐錢就可以同Cash合照,Cash又會喺義賣精品上蓋手印。雖然當日天氣高達三十幾度,加上佢咁厚毛,其實真係好辛苦,但佢一影相就自動自覺對住鏡頭笑!不過Cash都有脾氣o架,啲記者影相,如果兩個人加埋佢一齊影,要叫『三位』望呢面,佢先肯望鏡o架,叫『兩位』佢會擰歪面,直頭當自己係人。」

Cash由半歲大開始做義工,跟Cally四出探訪老人院,見到婆婆會主動親吻,帶給老人家不少歡樂。

 

自小受特訓的Cash,身手敏捷,表演跳圈、單手倒立,統統easy job。

 

每年大年初二,Cash都會跟Cally去護老院向長者拜年,醒目的Cash會施展渾身解數表演,但偶有蝦碌,場面爆笑。

 

Cash陪伴Cally一起生活了十四年,早已有晒默契,知道要與Cally拍照,會醒目望着鏡頭笑。

 

聞到最愛的鵝肝香味,Cash就會乖乖地坐在Cally身旁等開餐。

 

與佛有緣

Cash自小悟性高且有佛緣,○四年隨Cally到大嶼山寶蓮寺拍攝佛誕節目時,更有緣在佛祖舍利前進行了皈依儀式,獲賜法號「來法」。「嗰次同TVB拍節目,拍完打算離開時,釋智鴻法師帶我哋入咗佛祖舍利塔,仲親自同Cash進行皈依儀式,當法師讀完皈依宣誓詞,Cash仲錫咗法師一啖。當時大家都覺得佢與佛有緣。」

Cally坦言,無論人或動物,生、老、病、死乃必經階段,「咁多年嚟,我冇刻意去諗Cash可以活到幾多歲,只希望佢每日都健康平安,可以做嘅係令佢可以傳宗接代,留低啲血脈。佢o依家有囝囝Euro又有孫仔Bank,我只希望佢餘下嘅日子可以舒服啲,唔會有好大痛楚。至於佢之後去邊,我相信上天自有安排。」

與佛有緣的Cash,在佛壇前目不斜視,雙手合十,表現誠心。

 

Cash有緣在佛祖舍利前進行了皈依儀式,法號「來法」。

 

Cash是明星狗,是全港第一隻狗推出自傳《Cash Happy Book》,Cally又為牠推出一系列精品文具作義賣,並製作了兩個手印﹙右圖﹚代替簽名。

 

Cally安排Cash與馮美基的狗女SaSa﹙圖左﹚結婚傳宗接代,現有囝囝Euro﹙下圖右﹚和孫仔Bank﹙下圖中﹚。

 

 

    全站熱搜

    tvb4life 發表在 痞客邦 留言(0) 人氣()